Turan İbrahimov: “Televiziya gündəlik informasiya və əyləncə mənbəyi olaraq qalır” - FOTO
“Televiziya jurnalistikasında işləmək heç də asan məsələ deyil, filmlərdə gördüyünüz rəngbərəng xəyallara bənzəmir”.
Rakus.az xəbər verir ki, bu fikri “Baku TV”nin İnformasiya Proqramları və Qərbi Azərbaycan Departamentinin rəhbəri, teleaparıcı, jurnalist Turan İbrahimov Report Media Məktəbinin tələbələri ilə görüşündə deyib.
O, TV layihələrin hazırlanma prosesi, peşəkar jurnalistikanın reallıqları, informasiya istehsalı prosesi və müasir auditoriyanın dəyişən maraqları barədə danışıb.
“Bu gün ənənəvi televiziyanın auditoriyasını, əsasən, 60-dan yuxarı yaşlı insanlar təşkil edir. Televiziya, sadəcə, bu nəsil üçün gündəlik informasiya və əyləncə mənbəyi olaraq qalmaqdadır. Gənclərə hesablanan və daha çox internetdən yayımlanan televiziya isə fərqli qaydalarla fəaliyyət göstərir”, – jurnalist vurğulayıb.
Departament rəhbəri gənclərdə yaddaş itkisi problemi ilə bağlı fikirlərini də bölüşüb, əsas səbəblərdən biri kimi informasiya yükünün artmasını göstərib: “İnsan gündə onlarla qısa video, yazı və başlıq görəndə beyin onları strukturlaşdıra bilmir”.
Xatırladaq ki, Turan İbrahimov 1981-ci ildə Basarkeçər rayonunun Nərimanlı kəndində anadan olub. 1998-2002-ci illərdə Bakı Dövlət Universitetinin “Jurnalistika” fakültəsində təhsil alıb. 1999-cu ildən jurnalist fəaliyyətinə başlayıb. “ABA”, “Space”, “ATV”, “Lider”, “ANS”, “ATV” telekanallarında çalışıb. “ATV səhər”, “Space səhər”, “Günəbaxan” kimi proqram və verilişlərdə aparıcı olaraq tanınıb. 2023-cü il mayın 1-dən “Baku TV”də İnformasiya Proqramları və Qərbi Azərbaycan Departamentinin rəhbəridir.
Foto: Zaur Məhərrəmov
