Millət vəkillərinin səlahiyyətləri geniş olmalıdır – Fazil Mustafa

Rakus.az-ın “Seçici-deputat” rubrikasının növbəti qonağı Milli Məclisin deputatı Fazil Mustafadır.

 – Fazil müəllim, bir deputat kimi fəaliyyətinizi necə qiymətləndirirsiniz ?

– Bu barədə mənim bir söz demeyim o qədər də yaxşı olmaz. Deputatların fəaliyyətini seçicilər qiymətləndirməlidirlər. Ancaq mən çalışıram ki, seçicilərimin etimadını doğruldum.

– Seçki kompaniyasında verdiyiniz vədlərə necə, əməl edə bilirsinizmi ?

-Təbii ki hər birinə əməl etmək mümkün olmur. Buna baxmayaraq, əksər vədlərimi yerinə yetirmişəm və buna çalışıram. Dediyim kimi, bizim əsas qayəmiz qazanılan etimadı doğrultmaq və qoruyub saxlamaqdir.

– Seçicilərin narahatlığı daha çox hansı məsələ ilə bağlıdır ?

– Muxtəlif məsələlər var. Məsələn, bəzi binalarda liftlərin yararsız halda olması ən çox səslənən narazılıqlar sırasındadır.

– Gənclər arasında kriminalaşma hallarının getdikcə artmasını nə ilə əlaqələndirirsiniz ?

– Bəli, əfsuslar olsun ki, belədir. Konkret səbəb göstərmək düzgün olmaz. Bir neçə amil onlara təsir göstərir. Gənclər tələskən olurlar, bəzən soyuqqanlı davrana bilmirlər. Bu isə onların gələcəyinə mənfi təsir göstərir. Gərək gənclər kriminal hadisələri təbliğ edən filmlərə az baxsınlar.

– Bir deputat olaraq bundan çıxış yolunu necə görürsünüz ?

– Gənclər daha çox elmə, təhsilə maraq göstərməli, asudə vaxtlarını səmərəli keçirməlidirlər. Asudə vaxtlarda idmanla məşğul olmaq, müxtəlif dərnəklərə getmək onları pis vərdişlərdən uzaqlaşdıra bilər.

– Sizcə, sosial şəbəkələrin valideyn-övlad münasibətinə və ailə məsələlərinə mənfi təsiri varmı?

– Umumilikdə sosial şəbəkələrin mövcudluğuna etirazım yoxdur. Hətta deyərdim ki, əgər düzgün istifadə edərlərsə, sosial şəbəkələr gənclərin xeyrinədir. Lakin əfsuslar olsun ki, bəzi hallarda insanların, xüsusilə gənclərin sosial şəbəkələrə aludəçiliyi müxtəlif problemlərə səbəb olur. Əlbəttə, əgər süfrə arxasında belə ailə üzvlərinin başı telefona qarışarsa, bu, tez və ya gec onlar arasında problemlərlə nəticələnəcək. Yadda saxlamaq lazımdır ki, sosial şəbəkələr sadəcə asudə vaxtlarda informasiya mübadiləsi etmək, sosiallaşmaq üçündür. Bu, o demək deyil ki, gənclər günlərinin böyük əksəriyyətini sosial şəbəkələrdə keçirməlidirlər.

– Real şəraitdə seçici-deputat münasibəti necədir və necə olmalıdır ?

– Deputatlar xalqın problemlərini həll etməyə çalışan, onların səsini üst qurumlara çatdıran şəxslərdir. Bu mənada düşünürəm ki, millət vəkillərinin səlahiyyətləri daha geniş olmalıdır ki, insanların problemləri də daha tez və yüksək səviyyədə həll olunsun.

– Fəaliyyətinizə nəzər salanda növbəti seçkidə də deputat olmaq istərdinizmi ?

– Bu haqda düşünmək tezdir. Hər halda əvvəlcə partiyanın razılığı olmalıdır. Yalnız bundan sonra öz namizədliyimi irəli sürə bilərəm və çalışaram ki, əvvəlki illərdə edə bilmədiklərimi indi yerinə yetirim.

Kənan Novruzov