Hesablama Palatasının yeni Strateji İnkişaf Planı təsdiqləndi
Hesablama Palatasının kollegiya iclasında 2021-ci il üçün iş planının layihəsi müzakirə edilib.
Rakus.az xəbər verir ki, Palatanın mətbuat xidmətinin məlumatına görə, iclasda 2021-ci il üçün iş planında “Hesablama Palatası haqqında” Azərbaycan Respublikasının Qanununa uyğun olaraq növbəti ildə kənar dövlət maliyyə nəzarət tədbirləri və fəaliyyət üzrə hesabat, məlumat, rəylərin hazırlanması, həmçinin fəaliyyətin təşkili üzrə metodiki, maddi-texniki, insan resursları, informasiya təminatı və beynəlxalq fəaliyyət üzrə nəzərdə tutulan tədbirlər barədə geniş məlumat verilib, layihə kollegiya tərəfindən təsdiq olunub.
İclasda, eyni zamanda, Hesablama Palatasının uzunmüddətli dövr üçün inkişafını müəyyən edən və qurumun müxtəlif göstəricilərə nail olunması üçün baxış, missiya, dəyərlər, aralıq və yekun nəticələrini və fəaliyyət istiqamətlərini əks etdirən mühüm sənəd olan Hesablama Palatasının yeni Strateji İnkişaf Planının (SİP) layihəsi müzakirə edilərək təsdiqlənib.
Yeni Strateji İnkişaf Planı IDI-nın (INTOSAI-ın (Ali Audit Qurumlarının Beynəlxalq Təşkilatının) İnkişaf Təşəbbüsləri) “Ali Audit Qurumlarının Strateji İdarəetmə Təlimatı” əsasında hazırlanıb. Eyni zamanda, IDI tərəfindən Ali Audit Qurumlarının fəaliyyətinin qiymətləndirilməsi (SAI PMF) adlı proqramın nəticələri, həmçinin əsas maraqlı tərəflərin gözləntiləri təhlil edilərək yeni strateji sənəddə nəzərə alınıb.
