Görkəmli alimin xatirəsi yad edildi - FOTO
AMEA Mərkəzi Elmi Kitabxanasında Azərbaycanın ilk türkoloq alimi, professor, turk xalqları ədəbiyyatının, bütövlükdə mədəniyyət tarixinin əvəzolunmaz tədqiqatçısı Bəkir Çobanzadəyə həsr olunmuş konfrans keçirilmişdir.
Rakus.az xəbər verir ki, tədbirdə respublikamızın müxtəlif ali təhsil ocaqlarıının alimləri, müəllim və professor heyəti, tələbələr iştirak etmişlər.
Tədbiri giriş sözü ilə AMEA Mərkəzi Elmi Kitabxanasının direktoru Leyla xanım İmanova açmışdır. Professor Cəlal Qasımovun alimin həyat və fəaliyyəti, onun repressiya olunması məqamlarını konkret sənədlərlə, fakt və sübutlarla təsdiq edən, məntiqi təhlillərlə zənginləşdirən “Bəkir Çobanzadə” kitabı əsasında kitabxana işçiləri tərəfindən hazırlanmış qısametrajlı sənədli film böyük maraq doğurmuşdur. Ötən əsrin 60-cı illərində Bəkir Cobanzadə haqqında ilk elmi iş yazan professor Adil Babayev bir çox maraqlı faktları diqqətə çatdırmış, sualları cavablandırmışdır.
Şair, tərcüməçi, filologiya elmləri doktoru Ramiz Əskər alimin əsərlərinin tədqiqi, toplanması və nəşri barədə müfəssəl məlumat verərək konfransa xüsusi rəng qatmışdır.
Tədbir qarşılıqlı diskussiyalar, sual-cavablar şəklində davam etmişdir. Professor Cəlal Qasımovun uzunmüddətli arxiv araşdırmalarının nəticəsi kimi Azərbaycan elm, sənət və dövlət xadimlərinin, ziyalıların, sadə insanların belə yadellilər, xüsusən də ermənilər tərəfindən amansız təzyiqlərə, repressiyalara məruz qaldıqları barədə maraqlıfaktlar konfrans iştirakçılarında böyük maraq doğurmuşdur.
