Bakıda “Əbədiyyətə qovuşanlar” kitabının təqdimatı olub - FOTO
Aprelin 1-də Əmək və Sosial Münasibətlər Akademiyasında Binəqədi şəhidlərinin xatirəsinə həsr olunmuş “Əbədiyyətə qovuşanlar” kitabının təqdimatı olub.
Rakus.az xəbər verir ki, tədbirdə yerli icra hakimiyyəti orqanının nümayəndələri və şəhid ailələri iştirak ediblər.
Bildirilib ki, vəsait gələcək nəsillərin Qarabağ həqiqətlərini daha yaxşı mənimsəmələri üçün əvəzsiz mənbələrdəndir.
Kitabı “İnkişaf” Yerli Özünüidarəetmənin Təşviqi İctimai Birliyi hazırlayıb. Toplu Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə tərtib edilib. 73 şəhid haqqında məlumatın, xatirələrin toplandığı kitab “Şəhidlərimizi tanıyaq və tanıdaq” layihəsi çərçivəsində nəşr olunub.
Kitabda şəhid jurnalist Məhərrəm İbrahimov haqqında dolğun məqalə dərc olunub. “Göyçədən Qarabağadək – şəhid jurnalist Məhərrəm İbrahimovun ömür yolu” adlı məqalədə onun həyatı və fəaliyyəti haqqında dolğun məlumat verilib.
Çıxış edən şəhidlərin valideyn və yaxınları kitabı ərsəyə gətirənlərə təşəkkür edib, bunun vətənpərvər oğulların tanıdılması və yaşadılması üçün əvəzsiz vəsait olduğunu bildiriblər.
Bildirilib ki, bu kitab dövlət qurumlarına, tədris müəssisələrinə, kitabxanalara, məktəblərə təqdim olunacaq.
