Bakıda şəhid jurnalist Məhərrəm İbrahimovun da adının həkk olunduğu Memorial Kompleksin açılışı olub - FOTO
Bakıda Birinci Qarabağ, Aprel döyüşləri və Vətən müharibəsi şəhidlərinin xatirəsinə ucaldılan Memorial Kompleksin açılışı olub.
Rakus.az “Report”a istinadən xəbər verir ki, tədbirdə şəhid ailələri, müharibə veteranları, Binəqədi Rayon İcra Hakimiyyətinin başçısı Elxan Allahverdiyev, deputatlar, rəsmi şəxslər və ictimaiyyət nümayəndələri iştirak ediblər.
Tədbir torpaqlarımızın ərazi bütövlüyünün bərpası uğrunda canlarından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Daha sonra Memorial Kompleksin qarşısına əklil və gül dəstələri qoyulub.
Tədbirdə çıxış edən Binəqədi Rayon İcra Hakimiyyətinin başçısı Elxan Allahverdiyev deyib ki, Memorial Kompleks Birinci Qarabağ, Aprel döyüşləri və Vətən müharibəsində ölkəmizin ərazi bütövlüyü uğrunda şücaət göstərmiş Binəqədi rayonundan olan şəhidlərimizin əziz xatirəsinə ucaldılıb.
O söyləyib ki, Memorial Kompleksin mənəvi əhəmiyyəti böyükdür: “Binəqədi rayonunda şəhidlərimizin xatirəsinə Binəqədi, Biləcəri, Xocəsən qəsəbələrində Xatirə Kompleksləri, elə bu ərazinin yaxınlığında – Dərnəgül park ərazisində Vətən müharibəsində şəhadətə qovuşmuş üç min şəhidimizin əziz xatirəsinə yaşıllıq ərazisi salınıb. Bu gün Birinci Qarabağ, Aprel döyüşləri və Vətən müharibəsində canlarını fəda edən Binəqədi rayon şəhidlərinin əziz xatirəsinə həsr olunmuş Memorial Kompleksə 301 şəhidimizin adı və soyadı həkk olunub. Elektron tabloda bu şəhidlərimizin həyat tarixçəsi və keçdiyi döyüş yolu haqqında məlumatlar yer alıb”.
Xatırladaq ki, Memorial Kompleksdə 2021-ci il iyunun 4-də xidməti vəzifələrini yerinə yetirmək üçün işğaldan azad edilmiş Kəlbəcər rayonuna ezam olunmuş jurnalistləri aparan “KamAZ” markalı avtomobilinin rayonun Susuzluq kəndi ərazisində tank əleyhinə minaya düşməsi nəticəsində şəhid olan AZƏRTAC İnformasiya Agentliyinin müxbiri Məhərrəm İbrahimovun da adı həkk olunub.
