İranda artıq “məcburi hicab” mərhələsi bitib – POLİTOLOQ
İran geyim qadağalarına narazılıq davam edir. İran rejimi məsələ ilə bağlı qəti qərar verə bilmir. Xatırladaq ki, ötən ilin sentyabrında İranda 22 yaşlı Məhsa Əmininin hicab bəhanəsi ilə “Əxlaq” polisi tərəfindən öldürülməsi ölkə miqyasında etiraz aksiyalarının başlamasına səbəb olmuşdu. 500-dən çox insanın həyatını itirdiyi və hələ də davam edən nümayişlərdə əhali molla rejiminə etiraz edərək məcburi hicabın ləğvini tələb edir.
Lakin hazırda müşahidə olunan odur ki, baş verənlərdən sonra İranda hicab taxanların sayı azalıb. Rejim geyim azadlığı ilə bağlı islahatlara gedəcəkmi? Yoxsa bu rejimin qırmızı xəttidir?
Bununla bağlı “MediaPost”a açıqlama verən politoloq Sədrəddin Soltan bildirib ki, İranda bu istiqamətdə hicaba əməl edilməsi ilə bağlı qanun layihəsi hazırlanır və bu qanun layihəsi yaxın vaxtlarda parlamentə təqdim olunacaq:
“Parlamentin təsdiqindən sonra layihəni Ali Rəhbərlik İnstitutunda Nəzarət Şurası təsdiqləməlidir, bundan sonra isə qanun qüvvəyə minəcək. Amma hadisələr onu göstərir ki, İran hakimiyyəti artıq bu məsələyə göz yummaqdadır. Rəsmilər bəyan edir ki, bu hadisə dini ideoloji deyil, mədəni hadisədir və bu məsələni mədəni sahəyə aid etməyə çalışırlar. Ona görə də fikrimcə, İranda yaxın perspektivdə olmasa da, tezliklə hicabsızlıq, yaxud yarım hicablılıq məsələsi baş verəcək və bununla da Tehran hakimiyyəti özünü gözlənilən təhlükədən qoruya biləcək”.
Onun sözlərinə görə, İranda artıq “məcburi hicab” mərhələsi bitib:
“Artıq xanımlar bu istiqamətdə qələbə qazandılar. 44 il öncə əldən verdikləri mövqeyi bərpa etdilər. Çünki inqilabın ilk illərində iranlı xanımlar hicaba qarşı çox böyük müqavimət göstərmişdilər. Yeni qəbul ediləcək qanunda hicabın bir sıra mühafizəkar tərəfləri aradan qaldırılacaq. Həmin qanunda, məsələn, cəza vermək, xəbərdarlıq etmək, edam etmək, uzunmüddətli cəza planı nəzərdə tutulmayacaq. Yəni cəmiyyətin artan etirazını azaltmaq üçün İran hakimiyyəti mütləq müəyyən mənada güzəştə getməlidir”.
