“Biz öz istəyimizlə qaçqın olmamışıq”- MÜSAHİBƏ - VİDEO
Bu gün Baku Tv-də Qərbi Azərbaycan Xronikası layihəsi çərçivəsində rus dilində növbəti buraxılış efirə gedib.
Rakus.az xəbər verir ki, aparıcı Ellada Sarvanın müsahibi araşdırmaçı- hüquqşünas İradə Hacıyeva olub.
O, Qərbi Azərbaycanda anadan olduğunu, 1988-ci ildə doğma yaşayış məskəninizi məcburən tərk etdiyini, indiki Ermənistanda vaxtilə uzun müddət ictimai-siyasi fəaliyyətlə məşğul olduğunu deyib.
Onun sözlərinə görə, 1985-1988-ci illərdə Qərbi Azərbaycanın Çəmbərək, indiki Krasnoselo Rayon Partiya Komitəsində təlimatçı işləyib: “Ermənistan siyasi rəhbərliyinin azərbaycanlılara baxışı yaxşı olmayıb. Azərbaycan ziyalılarından rəhbər vəzifələrə heç kim seçilməzdi. Konfrans və plenumlarda azərbaycanlının təklif irəli sürmək hüququ yox idi. İclas zamanı azərbaycanlıların fəaliyyəti dayandırılırdı”.
İ.Hacıyeva Qərbi Azərbaycanın coğrafi-siyasi əhəmiyyətindən söz açıb, ermənilərin etnik təmizləmə, oğuz-türk izlərinin itirilməsi üçün hər şey etdiklərini söyləyib: “Vətəni tərk etmək dəhşətli bir hissdir. Qərbi Azərbaycanda faktiki olaraq erməni yox idi. Ermənilər bizim mahalların adlarını dəyişdilər”.
Hüquqşünas Qərbi azərbaycanlıların geri qayıdışının təmin olunması ilə bağlı hüquqi müstəvidə işlər aparıldığını, doğma Vətənə qayıdış üçün hüquqi cəhətdən heç bir problemin yaradılmasının mümkün olmadığını vurğulayıb: “Qərbi azərbaycanlıların Vətənə qayıdışının reallığa çevrilməsi üçün aparılan bugünkü siyasət yüksək qiymətləndirilməlidir. Soydaşlarımızın doğma yurda qayıdış vaxtı uzaqda deyil. Əminəm ki, bütün məsələlər sülh yolu ilə həll ediləcək. Biz öz istəyimizlə qaçqın olmamışıq. Geri qayıtmasaq, tarixi yaddaş yox olacaq. Vətəndən şirin heç nə yoxdur”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş oktyabrın 17-də saat 19:30-da Baku Tv-nin efirində və Youtube kanalında rus dilində yayımlanıb.
