“Eçmiədzin 1920-ci ilə qədər udiləri erməniləşdirmək siyasəti apardı” - FOTO - VİDEO

Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “Bu gün Qarabağ erməniləri kimi tanınanlar erməniləşdirilmiş albanlardır” adlı veriliş efirə gedib.

Rakus.az xəbər verir ki, verilişdə Alban-Udi Xristian dini icmasının sədri Robert Mobili XIX əsrdə Qafqaza gələn ermənilərin boş kilsələrin hamısını erməniləşdirməsindən söz açıb.

O bildirib ki, ermənilər Qafqazda 200 ildən çox yaşayıblar və müasir kilsələr tiksələr də alban kilsəsinin üstündə elementləri dəyişdirib, erməni kilsəsinə çeviriblər. Ermənilərin böyük xaçkar fırıldağının üstü açılıb.

Onun sözlərinə görə, bütün dini qurultaylarda Alban kilsəsinin patriarxı iştirak edirdi: “XIX əsrdə Qafqaza gələn ermənilər boş kilsələrin hamısını erməniləşdirdilər. 1836-cı ildə Qədim Alban irsi erməni kilsəsinin tabeliyinə verildi. Bu gün Qarabağ erməniləri kimi tanınan şəxslər erməniləşdirilmiş albanlardır”.

R.Mobili sonda vurğulayıb ki, Nic kilsəsini Eçmiədzinə (Üçkilsə) tabe etdirib, udi xalqını əritmək istəyirdilər: “Nic kəndinin sakinləri kilsəyə getməkdən imtina etdi. Eçmiədzin 1920-ci ilə qədər udiləri erməniləşdirmək siyasəti apardı.      Sovet hakimiyyəti kilsəni bağlamaqla udi xalqını xilas etdi”.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş yanvarın 22-də saat 20:30-da Baku Tv-nin efirində və saat 21:30-da Youtube kanalında yayımlanıb.