Azərbaycanın qədim silahları və süvarilik mədəniyyəti - VİDEO
Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “İrsimiz” rubrikasının növbəti buraxılışı hazırlanıb.
Rakus.az xəbər verir ki, buraxılışda tarix üzrə fəlsəfə doktoru, dosent Səbuhi Əhmədov Qərbi Azərbaycanın silah məktəbi, İrəvanın silah mədəniyyəti, Sərdar sarayının itirilən xəzinəsi və s. məsələlərdən danışıb.
O, Mirzə Qədim İrəvaninin panolarında sərkərdə obrazlarının sirri, Gürcüstan Milli Muzeyində saxlanılan Azərbaycan silahları, İrəvan ustalarının dəbilqə, qalxan, qılınc sənəti, Mir Möhsün Nəvvabın silah kolleksiyası və İrəvani ilə gizli paralellər, XIX əsr foto yaddaşı, Dmitriy Yermakovun Sərdar sarayı kadrları, İrəvan panolarında sərkərdələrin tarixi ilə bağlı maraqlı faktlar açıqlayıb.
S.Əhmədov etiuni izləri, Assuriya və Urartuya qarşı savaşın arxeoloji sübutları, tunc dövründə döyüş səhnələri, qədim texnologiyanın kodu, süvarilik mədəniyyəti, Zəngəzur, Qarabağ, Şirvan, Mil-Muğanda eyni mədəniyyətin izləri, kurqan və katakomba qəbirlərində tapılan, eləcə də İrəvan ustalarının hazırladığı silahlardan söz açıb.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş noyabrın 8-də saat 19:00-da Baku Tv-nin efirində və saat 21:30-da Youtube kanalında yayımlanıb.
