Bakıda Zəfər Gününə həsr olunmuş Minifutbol Festivalı keçirilib - FOTO - VİDEO
Bakıda Zəfər gününə həsr olunmuş jurnalistlər arasında minifutbol üzrə festival keçirilib.
Rakus.az xəbər verir ki, festivalda iştirak edən Rusiyanın idman jurnalistlərindən ibarət komandası ölkəmizin 3 yerli jurnalistlərindən ibarət komandası ilə qarşılaşıb. İlk görüş Sumqayıtın jurnalistlərdən ibarət komandası ilə olub. Sumqayıtlılar 19:1 hesabıyla yenilib.
Növbəti oyun günündə Rusiya komandası “Media 1” komandasına 10:3 hesabı ilə qalib gəlib. Bu qarşılaşmada hesabı açan jurnalistlərimiz olsa da yekun nəticədə qalib Rusiya təmsilçiləri olub.
Noyabrın 22-də baş tutan sonuncu görüş gərgin mübarizə şəraitində keçib. “Media 2” komandası ilə qarşılaşan rusiyalılar ilk hissənin sonlarına yaxın hesabı bərabərləşdirə biliblər. İlk qolu vuran və hesabda önə çıxan yerli jurnalistlərimiz ikinci hissədə də çox baxımlı oyun nümayiş etdiriblər. Sonda 9:8 hesabı ilə rusiyalı qonaqlar qalib gəlib.
Rusiya komandası bu festivalda məğlubiyyətsiz seriyasını qoruyaraq Qalib elan olunub.
Sonda şimal qonşumuzun təmsilçiləri kubok və medallarla təltif olunub, görüşün ən yaxşı oyunçularına hədiyyə təqdim edilib.
Qonaqlar təşkilatçılıqdan razı qaldıqlarını, bu festivalın dostluq baxımından əhəmiyyətindən danışıb, bunun ənənəvi hal almasını arzuladıqlarını bildirib və azərbaycanlı həmkarlarını Moskvaya dəvət ediblər. Onlar Bakı şəhərinin gündən-günə gözəlləşdiyini, Azərbaycan paytaxtını çox bəyəndiklərini, xalqımızın səmimiyyətinə və qonaqsevərliyənə valeh olduqlarını söyləyiblər.
Qeyd edək ki, idman jurnalistləri komandasına dəstək nümayiş etdirən “YaaRa” tekstil fabrikinin rəhbəri Yaqut Bayram da tədbirdə fəxri qonaq kimi iştirak edib və təşkilatçılar tərəfindən ona “Zəfər” hədiyyələri təqdim olunub.
