Qarabağda ermənilər təbii sərvətləri vəhşicəsinə talayırlar
Özbəkistanın interpress.uz portalında Azərbaycanın Ermənistan tərəfindən işğal olunmuş ərazilərində təbii ehtiyatların talanması ilə bağlı məqalə yerləşdirilib.
Rakus.az xəbər verir ki, yazıda qeyd edilir ki, Ermənistan Azərbaycanın işğal olunmuş Dağlıq Qarabağ bölgəsində və digər ərazilərində təbii sərvətləri vəhşicəsinə talayır. “Bu yaxınlarda İngiltərə tədqiqatçısı Harrold Keyn öz yazılarında və kitabında ermənilərin Dağlıq Qarabağdakı qanunsuz fəaliyyətindən bəhs edib. O, bu məsələdə Robert Köçəryanın, Serj Sarkisyanın və başqalarının adını çəkib. Keyn yazır ki, Azərbaycanın işğal edilən ərazilərindən çıxarılan qızılın Dağlıq Qarabağdan daşınması maraq doğurur. Belə ki, deklarasiya edilməyən qızıl gizli yollarla Livana aparılır. Burada qiymətli metallar bazarına nəzarət edən ermənilər tərəfindən Livan qızılı kimi satılır”,-deyə məqalədə vurğulanır.
Yazıda bildirilir ki, əvvəllər bu işdə “Kanada Livan Bankı” da iştirak edib. Sonralar isə “Hizbullah”ın pullarının yuyulmasında adı çəkilən bu bank ABŞ-ın sabiq Prezidenti Barak Obama administrasiyasının təkidi ilə bağlanılıb. Keyn yazır ki, Köçəryan-Sarkisyan cütlüyü Qarabağ qızılı ilə “Hizbullah” terrorçularının güclənməsinə kömək edib.
