İsmayıllıda asma körpü nəzarətdədir – REAKSİYA
Saytımızda yerləşdirilən “İsmayıllı: Böyük faciənin astanasındayıq” başlıqlı yazı göslənildiyindən də çox geniş reonans doğurdu. Oxucuların çoxsaylı fikirləri və haqlı narazılıqları məsələnin son dərəcə ciddi və vacib olduğunu bir daha göstərdi. Çünki söhbət 50 qəpik müqabilində onlarla insanın taleyindən gedir.
İsmayıllı Rayon İcra Hakimiyyətinin məsələsə reaksiyası da operativ oldu. Belə ki, yazının dərcindən bir neçə saat sonra redaksiyamızın elektron ünvanına icra hakimiyyəti tərəfindən daxil olan rəsmi məktubdan görünür ki, problemli məsələ onlar üçün də ciddi narahatlıq yaradır və buna qarşı tədbir görməyə çalışırlar. Məktubu olduğu kimi diqqətinizə çatdırırıq:
“Rakus.az saytının rəhbərliyinə
Hörmətli sayt rəhbəri!
Zərnava körpüsü ilə bağlı yaranmış problemin ardan qaldırılması üçün mövcud vəziyyəti faktlarla işıqlandırdığınız üçün Sizə təşəkkürümüzü bildiririk.
Məlumat üçün bildiririk ki, körpü Zərnava bələdiyyəsinin balansındadır. Sizin qaldırdığınız problemin həlli ilə bağlı bələdiyyənin sədri Afaq Məhərrəmova bir neçə dəfə İcra Hakimiyyətinə dəvət olunaraq problemin aradan qaldırılması üçün təxirəsalınmaz tədbirlər görülməsi tövsiyə olunmuşdur. Bələdiyyə sədri A.Məhərrəmova promlemin aradan qaldırıldığı haqqında İcra Hakimiyyətinə rəsmi məlumat verilmişdir. A.Məhərrəmovaya gələcəkdə də hər hansı hadisənin baş verməməsi üçün körpünün yükgötürmə qabiliyyətinin dəqiq yoxlanılması ilə əlaqədar rəsmi təşkilatların rəyinin alınması məsləhət görülmüşdür.
Bütün bunlara baxmayaraq problemin həlli ilə əlaqədar əsaslı tədbirlər görülmədiyi üçün 01 avqust 2019-cu il tarixdə bələdiyyəyə rəsmi məktub göndərilmişdir.
Məktubun sürəti əlavə olunur.
Xahiş edirik nəzərə alasınız.
İsmayıllı Rayon İcra Hakimiyyəti başçısı aparatının
İnformasiya təminatı və təhlil sektoru
Bu yazışmalar onu göstərir ki, İsmayıllıda asma körpü problemi hələ də davam edir. Bütün bu məsələlərə cavabdeh olan Zərnava bələdiyyəsinin sədri Afaq Məhərrəmova ilə telefonla danışdıq. Bələdiyyə sədri buna görə tam məsuliyyət daşıdıqlarını deməklə körpüyə nəzarəti gücləndirəcəklərini bildirdi.
