Ən çox Avropaya məhsul göndərmişik – STATİSTİKA
Azərbaycandan bu ilin yanvar-fevral aylarında Avropa İttifaqına (Aİ) üzv ölkələrə 2 milyard 201 milyon 173 min ABŞ dolları dəyərində məhsul ixrac edilib.
Rakus.az xəbər verir ki, Dövlət Gömrük Komitəsindən verilən məlumata görə, bu göstərici 2018-ci ilin müvafiq dövrünə nisbətən 1 milyard 66 milyon 804 min dollar çoxdur.
Ötən iki ayda Aİ ölkələrindən Azərbaycana idxal edilən məhsulun dəyəri isə 329 milyon 870 min dollar olub.
Həmin dövrdə MDB ölkələrinə isə 143 milyon 72 min ABŞ dollarlıq məhsul ixrac olunub. Bu, 2018-ci ilin eyni aylarına nisbətən 6 milyon 331 min dollar azdır.
Bu ilin ilk iki ayında Azərbaycanın MDB ölkələrindən idxal etdiyi məhsulun dəyəri isə 425 milyon 928 min dollar olub.
Ayrı-ayrı ölkələr üzrə isə ən çox məhsul İtaliyaya göndərilib. Belə ki, ötən iki ayda ixracda əsas ölkələrin siyahısında ilk sırada İtaliya olmaqla, Türkiyə və Almaniya qərarlaşıb. İtaliyaya ixrac 1 milyard 187 milyon 392 min ABŞ dolları, Türkiyəyə 274 milyon 742 min dollar, Almaniyaya isə 240 milyon 647 min dollar dəyərindədir.
Azərbaycanla ticarət dövriyyəsində əsas ölkələrin siyahısında ilk üçlükdə İtaliya, Türkiyə və Rusiya dayanır. İtaliya ilə ticarət dövriyyəsi 1 milyard 239 milyon 616 min dollar, Türkiyə ilə 471 milyon 377 min dollar, Rusiya ilə isə 340 milyon 512 min dollar təşkil edib.
