İranın nüvə proqramı -BAEA-nın narhatlığı – TƏHLİL - FOTO
Beynəlxalq Atom Enerjisi Agentliyinin (BAEA) Baş direktoru vəzifəsini icra edən Kornel Feruta sentyabrın 8-də İrana səfəri baş tutub.
Rakus.az xəbər verir ki, K.Ferutanın Tehranda İranın Atom Enerjisi üzrə Agentliyinin rəhbəri Əli Əkbər Salehi və Xarici İşlər naziri Məhəmməd Cavad Zərif ilə görüşlərinin mahiyyəti açıqlanmır.
Rəsmi Tehran nüvə proqramını bərpa etdiyini bəyan etdikdən dərhal sonra K.Ferutanın Tehrana səfərə hazırlaşması təsadüfi xarakter daşımır.
İran və Qərb mətbuatında dərc olunan materialların təhlili göstərir ki, həm ABŞ, həm də Avropa ölkələri İranın nüvə proqramını bərpa etməsindən narahat olublar. Buna görə də, İranı danışıqlara razı salmaq üçün beynəlxalq agentliyin rəhbərini Tehrana göndəriblər.
İran tərəfinin öz nüvə proqramının genişləndirilməsinə dair planlarını açıqlayacağı da gözlənilir.
Almaniya və Avropa İttifaqı İranı 2018-ci ildə ABŞ-ın birtərəfli qaydada tərk etdiyi beynəlxalq razılaşmaya bundan sonra da əməl etməyə çağırıblar. Razılaşmanı qismən tərk etməklə İranın öz nüvə texnologiyası və nüvə tədqiqatlarını inkişaf etdirəcəyi ehtimal olunur.
İranın Atom Enerjisi üzrə Agentliyinin təmsilçisi Bəhruz Kamalvəndi sentyabrın 7-də deyib ki, İranın nüvə proqramının bərpası istiqamətində atdığı üçüncü addım əsasən nüvə texnologiyasının inkişaf etdirilməsindən ibarət olacaq.
O bildirib ki, İran artıq nüvə proqramını bərpa edib və uranı 20 faizdən çox həcmdə zənginləşdirmək niyyətindədir.
B.Kamalvəndi qeyd edib ki, İran əvvəlki illərdə olduğu kimi Atom Enerjisi üzrə Beynəlxalq Agentliyin nümayəndələrinin nüvə obyektlərinə baxış keçirmələrini qadağan etməyəcək. Onlara istənilən nüvə obyektində aparılan işlərlə tanış olmaq üçün imkan yaradılacaq.
O diqqətə çatdırıb ki, əgər Avropa ölkələri “Nüvə sazişi” üzrə üzərlərinə düşən öhdəlikləri yerinə yetirsələr, onda İran nüvə tədqiqatlarının bərpasını dayandıra bilər.
İranın milli televiziyasında çıxış edən Prezident Həsən Ruhani isə bəyan edib ki, vəziyyətin bu həddə çatması və rəsmi Tehranın nüvə proqramını bərpa etməsinin təqsirkarı ABŞ-dır.
Xatırladaq ki, K.Ferutanın səfəri nüvə üzrə beynəlxalq təşkilat rəhbərinin son 2 ildə İrana ilk səfəridir. BAEA-nın baş direktoru Yukiya Amano iyulda vəfat etdikdən sonra, onun səlahiyyətlərini müvəqqəti olaraq K.Feruta icra edir.
