QARADAĞ: Ələt bələdiyyəsi etimadı doğruldur
Bələdiyyə institunun formalaşması və fəaliyyətinin genişlənməsi öz müsbət nəticəsini verməkdədir. Mövcud bələdiyyələrin fəaliyyətinin başa çatmasına bir neçə ay qaldığından bunu əyani surətdə görmək mümkündür. Konkret olaraq Qaradağ rayonunun Ələt bələdiyyəninin fəaliyyətinə toxunmaq istərdik. Belə ki, bələdiyyə sədri Azad Musayevin verdiyi məlumata görə, son illər qəsəbədə xeyli işlər görülür. Xalqımızın milli bayramları mütəmadi surətdə keçirilir, hüzn günü qeyd olunur. Ramazan bayramında iftar süfrələri açılır, Qurban bayramında 150-dən çox imkansız ailəyə yardım edilir. Qələbə günü veteranlarla görüşlər keçirilir. Qəsəbə sakinlərinin xeyir-şər məclislərinin normal qaydada keçirilməsi üçün mağarlar, stol-stul düzəldilərək onların ixtiyarına verilib. Ağacəkmə aksiyası müvafiq vaxtlarda təşkil olunur və abadlaşmaya ciddi yanaşılır. Məişət tullantılarının yığılması üçün xüsusi yerlər düzəldilib. Qəsəbədaxili yollar təmir olunub. İl ərzində 86 yazılı və 211 şifahi müraciətə baxılıb.
Qeyd olundu ki, bütün bunlarla yanaşı sakinlərlə vaxtaşırı görüşlər keçirilir, qaldırılan məsələlər səlahiyyət çərçivəsində həll edilir.
Bələdiyyənin sədri Azad müəllim ölkəmizi beynəlxalq arenada da yetərincə təmsil edib, müxtəlif ölkələrdə keçirilən beynəlxalq tədbirlərdə iştirak etməklə bələdiyyə institunun daha yaxşı formalaşması üçün dəyərli fikirlərini bildirib.
