“Bavariya” baş məşqçisini istefaya göndərdi
Almaniyanın “Bavariya” klubunda baş məşqçi istefası gerçəkləşib.
Rakus.az xəbər verir ki, Münhen klubu xorvatiyalı Niko Kovaçla müqaviləyə qarşılıqlı razılaşma ilə xitam verib.
Buna komandanın son uğursuzluqları səbəb olub. Bundesliqanın son turunda “Ayntraxt”a 1:5 hesablı məğlubiyyət isə rəhbərliyin səbir kasasını daşırıb. Son çempionun 10 turdan sonra 4-cü pillədə qərarlaşması da belə addım atmağa əsas verib.
Noyabrın 2-də keçirilən oyundan sonra klubdaxili iclasın baş tutduğu və 48 yaşlı mütəxəssisə 2 oyunluq vaxt veriləcəyi bildirilirdi. Lakin sonradan N.Kovaçın istefasını gözlətməmək məqsədəuyğun sayılıb. Komandaya müvəqqəti rəhbərlik etmək isə köməkçi məşqçi Hans Flikə tapşırılıb.
Xatırladaq ki, xorvatiyalı 2018-ci aprelindən “Bavariya”nı çalışdırırdı.
