FHN-in Qarabağ Regional Mərkəzi mülki müdafiə məşqi keçirdi - FOTO
Fövqəladə Hallar Nazirliyi (FHN) Qarabağ Regional Mərkəzi Füzuli rayon hərbiləşdirilməmiş ərazi mülki müdafiə qüvvələri ilə xəbərdarlıq və toplanış üzrə nümunəvi məşq keçirib.
Rakus.az xəbər verir ki, FHN-dən bildiriblər ki, məşqə Qarabağ Regional Mərkəzinin Mülki Müdafiə İdarəsinin zabit heyəti, Füzuli Rayon İcra Hakimiyyətinin mülki müdafiə qərargahı və xidmətləri, həmin xidmətlərdə yaradılmış ərazi mülki müdafiə qüvvələri – rabitə və xəbərdarlıq, ictimai asayişin mühafizəsi, sığınacaq və daldalanacaq, yanğın təhlükəsizliyi, elektrik qəza, qaz qəza, su-kanal qəza, tibb, sanitar epidemioloji, baytarlıq, avtonəqliyyat, yol-körpü istismar xidmətlərinin, ərazi kəşfiyyat qrupunun və ərazi xilasetmə dəstəsinin şəxsi heyəti və texnikaları cəlb olunub.
Ümumilikdə 15 idarə, müəssisə və təşkilat, 28 texnika və 132 nəfərlik şəxsi heyətin qoşulduğu məşqin keçirilməsində məqsəd mülki müdafiə tədbirlər planlarının reallığının yoxlanması, cəlb olunan şəxsi heyətin biliklərinin təkmilləşdirilməsi, qarşılıqlı fəaliyyətin təşkili və bu sahədə əməli vərdişlərin aşılanmasından ibarət olub.
Məşq zamanı hərbiləşdirilməmiş ərazi mülki müdafiə dəstələrinin fövqəladə hal barədə xəbərdar edilməsi, xəbərdarlıq toplanışı siqnalı ilə qaldırılması, toplanma məntəqəsinə yürüş, toplanış və idarəetmənin təşkili üzrə fəaliyyətləri yoxlanılıb, həmçinin funksional vəzifələrlə bağlı məruzələr dinlənilib.
Sonda Füzuli Rayon İcra Hakimiyyəti başçısının birinci müavini – rayon fövqəladə hallar komissiyasının sədri Bağır Aslanov və FHN Qarabağ Regional Mərkəzinin rəisi əvəzi kapitan Eldəniz Bayramov, mülki müdafiə tədbirlərinin planlaşdırılması şöbəsinin rəisi, kapitan Elçin Rəcəbov çıxış edərək bildiriblər ki, ərazi mülki müdafiə dəstələri ilə xəbərdarlıq və toplanış üzrə məşqin keçirilməsi əhalinin fövqəladə hallardan qorunmasına təminat verir.
Nümunəvi məşqin gedişinə baxış keçirildikdən sonra müvafiq təhlillər aparılıb, yaranan çatışmazlıqların aradan qaldırılması üçün tapşırıq və tövsiyələr verilib.
