Sosial 23.11.2019 23:44

Sabah üçün çalışarkən, bu günü itiririk… – Tələbə yazır

Ölçü

A+ A- A

İnsanlar daima özləri üçün ən idealı istəyir, özlərini hər şeyin ən yaxşına layiq görür və bunun üçün çalışırlar.Təbii ki, həyat bir velosiped kimidir, pedalı çevirdiyiniz müddətcə yıxılmarıq.

Claude Pereer

Bu, sizi daim uğurlara, yeni məqsədlərə sövq edər…. Ancaq bəzən istədikləri üçün mübarizə aparmaq yerinə qarşılarına çıxan ilk əngəldə hər şeyin daha da pis olacağına inanaraq bütün ümidlərini itirər, bəzən isə qarşılarına qoyduqları məqsəd üçün getdikləri yolda itirdiklərini görməzlər. Daha doğrusu, hər zaman əvvəlkindən yaxşı bir sabah üçün çabalayarkən, sabah bu uğurun dadını çıxarmaq əvəzinə, yeni məqsədlərə can atarlar. Hər zaman daha çoxuna nail olmağa çalışan insan oğlu sabahlar üçün bütün bu gün və dünənlərini qurban verər. O, heç vaxt bu günkü həyatını yaşamaz, uğrunda çalışdıqlarının bu gün onun əlində olduğunu anlamaz, xoşbəxtliyi daim sabahlarda görər. Məncə, həyat anı yaşaya bilənlərə gözəldir. İngilis yazıçısı Oskar Uayldın dediyi kimi, insanların az bir qismi xoşbəxt, bir o qədəri də bədbəxtdir. Yerdə qalan hamısı xoşbəxt görünüşlü bədbəxtlərdir. Bir vaxtlar xəyal kimi gələn arzuların reallaşması onlar üçün heç nə ifadə etmir artıq… Çünki həyatı bir nöqtəyə baxaraq gedirlər və xoşbəxtliyi yolun sonundakı o nöqtədə görürlər. Halbuki insan arzuları bitib tükənməz. Hər gün nəyəsə can atarsan-yeni xəyallara, həyatını gözəlləşdirə biləcək yeni məqsədlərə. Ancaq unudulan nədir? Bu gün qurduğun xəyallar kimi, bir zamanlar xəyalını qurduğun uğurunun vaxtı gələndə artıq sənin üçün heç nə ifadə etməməsi…Ən böyük peşmanlığı da məhz onda yaşayırsan.

İnsanlar yalnız bir nöqtəyə baxaraq getdikləri həyat yolunda qarşılaşdıqlarının, yaşadıqlarının, keçirdikləri hisslərin arasındakı xoşbəxtlikləri görmürlər… Çünki onlara baxmadan öz hədəflərinə doğru ötüb gedirlər… Bir zaman ayıldıqlarında isə geriyə nə qalır? Görürsən ki, artıq qocalmısan və ” Gənclikdən mənə nə qaldı?” deyə düşünürsən. O uğruna illərini, sağlamlığını verdiyin, özünü incitdiyin xoşbəxtliklərini görmədən keçib getdiyin yolun sonunda nə qaldı? “Dəmiri pas, insanı tamah məhv edər” deyirlər. Ona görə də mükəmməl anı, daha yaxşı bir sabahı gözləmək yerinə hazırda olduğunuz anı mükəmməlləşdirin. Və hər nə olursa olsun, içinizdəki sevinc hissini yaşaya bilin…

Məşhur filosof Oşo deyirdi: “Əlimizdən sevinc hissini alan üç şey var. Keçmişə baxıb heyifsilənmək, gələcəyə baxıb qayğılanmaq, bu günə baxıb şükür etməmək…”.

Çalışın həyatınızı sabahın qayğısını çəkib, keçmişin səhvlərinə ilişib qalmadan doya-doya bu gün üçün yaşayın. Çünki sabah üçün çalışdıqlarınız bu gün üçün itirdiklərinizi geri qaytarmayacaq…