Bakıda Akselerator Laboratoriyası açıldı
Noyabrın 29-da BMT-nin İnkişaf Proqramının (BMTİP) Azərbaycanda Akselerator Laboratoriyasının açılışı olub.
Rakus.az xəbər verir ki, açılış mərasimində hökumət, vətəndaş cəmiyyəti, özəl sektor və beynəlxalq ictimaiyyət nümayəndələri iştirak ediblər.
Akselerator Laboratoriyası iqlim dəyişikliyi, yoxsulluq və artmaqda olan bərabərsizlik halları kimi qlobal problemlərin yeni həll yollarını sınaqdan keçirmək və dəyərləndirmək üçün dünyanın 78 ölkəsində fəaliyyət göstərən 60 laboratoriyadan ibarət şəbəkəyə qoşulacaq.
BMTİP, Almaniya və Qətər Fondu tərəfindən dəstəklənən bu laboratoriyalar XXI əsrdə inkişafın sürətlə dəyişən reallıqlarına cavab vermək üçün real vaxtda əldə edilən məlumatların yeni mənbələri və sınaqlarla birgə yerli ideyaları bir araya gətirəcək.
Tədbirdə çıxış edən BMTİP-nin rezident nümayəndəsi Alessandro Frakassetti bildirib: “Bizim 2030-cu ilədək 17 Dayanıqlı İnkişaf Məqsədinə nail olmaq üçün cəmi 10 il vaxtımız var. Buna görə də burada sürət vacib məqamdır. Məqsədlərə nail olmaq istiqamətində tələb olunan sosial və iqtisadi dəyişikliklərə başlamaq üçün biz daha dərin, sürətli və daha məqsədyönlü tədbirlər görməliyik. Akselerator Laboratoriyası bu təxirəsalınmaz tələbi yerinə yetirmək üçün BMTİP tərəfindən görülən tədbirlərin bir hissəsidir”.
Almaniyanın Azərbaycandakı səfiri Volfqanq Maniq çıxışında bu qlobal təşəbbüsdə BMTİP ilə tərəfdaşlıq etməkdən qürur duyduqlarını bildirib: “Bu şəbəkə əməkdaşlıq üçün yeni, hər bir millət və hər bir fərddən iştirak tələb edən Dayanıqlı İnkişaf Məqsədlərinə nail olunması üçün xidmət edəcək. Bu laboratoriyalar XXI əsrdə inkişaf problemlərini həll etmək üçün yeni imkanlarla, iqlim dəyişikliyi, idarəçilik və yoxsulluğun azaldılması sahəsində BMTİP-nin uzunmüddətli təcrübəsindən bəhrələnəcək. Qlobal səviyyədə inkişafla bağlı xidmətlərə yenidən nəzər salmaq üçün missiyamıza kömək etmək məqsədilə 150-dən çox alim, layihəçi və etnoqraf bu laboratoriyalara qoşulur”.
Sonra çıxış edən Qətərin Azərbaycandakı səfiri Feysal bin Abdullah Həməd Abdullah Al Hinzab deyib ki, laboratoriyalar yaranmaqda olan və sürətli inkişaf trendlərini, ideyalarını ortaya çıxararaq geniş çərçivədə işləməklə 2030 Gündəliyinə daha yüksək templə nail olmağa xidmət edəcək.
Azərbaycanda artıq ağıllı şəhərlər, şəhər inkişafı, aqrobiomüxtəliflik, nəqliyyat, informasiya texnologiyaları və səhiyyə kimi sahələrdə innovativ həll yollarının xəritələşdirilməsi üçün tədqiqatçılardan, xəritələşdirmə və sınaqdankeçirmə üzrə mütəxəssislərdən ibarət yerli qrup təsis olunub.
Qrup ölkədə iş yerlərinin yaradılmasına, yeni vərdişlərin inkişaf etdirilməsinə və əlilliyi olan insanların yaşayışının yaxşılaşdırılmasına kömək edə bilən həll yollarının müəyyənləşdirilməsi və önə çəkilməsi üçün yerli əhali, həmçinin innovatorlarla birgə fəaliyyət göstərəcək, hökumət, beynəlxalq tərəfdaşlar və özəl sektor ilə əməkdaşlıq edəcək.
