ÜMŞA nümayəndə heyəti Naxçıvanda KİV-lərin fəaliyyəti ilə tanış oldu - FOTO
Ümumdünya Mətbuat Şuraları Assosiyasının (ÜMŞA) üzvləri dekabrın 1-də Naxçıvanın tarixi ənənələrə malik “Şərq qapısı” qəzetinin və eyni adlı nəşriyyatın, həmçinin Naxçıvan Dövlət Televiziyasının və “Nuhçıxan” İnformasiya Agentliyinin fəaliyyəti ilə tanış olublar.
Rakus.az xəbər verir ki, bu barədə Azərbaycan Mətbuat Şurasının sədri, Milli Məclisin deputatı Əflatun Amaşov “Facebook” səhifəsində məlumat verib.
O bildirib: “Sevindirici haldır ki, 1921-ci ildə nəşr başlamış “Şərq qapısı” ənənələrinə sadiqdir. Burada müasir texnologiyaların tətbiqi və işə yaradıcı yanaşmanın çulğalaşdığını gördük. Həftənin beş günü işıq üzü görən nəşrin müxtəlif sahələr üzrə ixtisaslaşmış yüksək kadr potensialı var. Qəzetin elektron versiyası və daim yenilənən saytı var. Təqdirəlayiq haldır ki, nəşr üçün kadrlar Naxçıvan Dövlət Universitetinin jurnalistika fakultəsindən, özü də ilk kurslardan başlayaraq seçilir və təcrübə keçdikdən sonra işə dəvət olunur. Bu, jurnalistika işinə həm önəm verilməsinin, həm də sistemli yanaşılmasının göstəricisidir. “Şərq qapısı” nəşriyyatında Naxçıvanda fəaliyyət göstərən qəzetlərlə yanaşı, kitablar, müxtəlif ciddi sənədlər yüksək keyfiyyətlə nəşr olunur. Dünya standartlarına cavab verən müasir avadanlıqlar nəfis tərtibatlı nümunələrin ərsəyə gəlməsinə imkan verir.
Naxçıvan Dövlət Televiziyası Azərbaycanda ilk dəfə rəqəmsal yayıma keçmiş telekanaldır: “Burada diqqətimizi əsasən Naxçıvan Dövlət Universitetinin jurnalistika fakultəsinin məzunlarından, habelə tələbələrindən ibarət kadr potensialı, ən müasir texnoloji vasitələrin tətbiqi çəkdi. Televiziyaya ziyarətimiz xoş təəssürat zənginliyi ilə yadda qaldı. Çünki işə məsuliyyətli münasibət hər addımda hiss olunmaqdadır. İstər proqramların mövzu seçimi, istərsə də səhnə-dekorasiya və studiya tərtibatları mükəmməl səviyyədədir. Ən əsası isə burada milli-mənəvi dəyərlərə sadiqliklə peşəyə sevgi ruhunun vəhdəti var. Heç şübhəsiz, telekanal daha da inkişaf etməli, əldə olunanlarla kifayətlənməməlidir. Rəhbərlik və kollektiv bunu əməli şəkildə dərk edir. Yeri gəlmişkən, Naxçıvan televiziyası ansamblının xalq və bəstəkar mahnıları ilə zəngin repertuarı xarici qonaqlarda və bizdə misilsiz xoş ovqat yaratdı.
“Nuhçıxan” İnformasiya Agentliyi hələ gəncdir. Cəmi iki ilə yaxındır fəaliyyətdədir. Agentlikdə ciddi işgüzar ab-hava hökm sürür. Bu isə onu deməyə əsas verir ki, agentliyin uğurları özünü çox gözlətməyəcək”.
Ümumdünya Mətbuat Şuraları Assosiasiyası üzvlərinin Naxçıvana səfəri davam edir.
Xatırladaq ki, nümayəndə heyətinə ÜMŞA-nın rəhbəri Sule Alet, Azərbaycan Mətbuat Şurasının sədri, Milli Məclisin deputatı Əflatun Amaşov rəhbərlik edirlər. ÜŞMA üzvləri noyabrın noyabrın 30-da Naxçıvandakə xəstəxanada Krımda Simferopol Dövlət Radiosunun Azərbaycan proqramının qurucusu və rəhbəri Həbib Ağayevi ziyarət edib, Heydər Əliyev muzeyi ilə tanış olublar. Həmçnin Naxçıvan Dövlət Universitetində, universitetin jurnalistika fakultəsində tələbə-gənclərlə görüşüblər.
