Fuad İbrahimovun dirijorluğu Latviyaya səs saldı - FOTO
Latviyanın paytaxtı Riqanın əsas konsert salonu – Böyük Gildiyada Azərbaycanın Əməkdar artisti Fuad İbrahimovun dirijorluğu ilə Latviya Milli Simfonik Orkestri konsert proqramı ilə çıxış edib.
Rakus.az xəbər verir ki, konsert çərçivəsində dünya simfonik musiqisinin şedevrləri – P.Çaykovskinin beşinci simfoniyası, V.A.Motsartın “Sehrli fleyta” operasından uvertürası və klarnet və orkestr üçün əsərləri ifa olunub.
Solisti latviyalı ifaçı Martinş Tsirsenis olan konsertdə təqdim olunan əsrarəngiz ifalar tamaşaçılar tərifindən sürəkli alqışlarla qarşılanıb. Fuad İbrahimovun peşəkar dirijorluq məharəti latviyalı tamaşaçıların marağına səbəb olub.
Xatırladaq ki, “Qızıl Çinar” mükafatı laureatı F. İbrahimovun qastrol marşrutları ənənəvi olaraq dünyanın ən müxtəlif ölkələrindən keçir. Həmyerlimiz bu il Fransa, Almaniya, Yaponiya, İspaniya, İsveçrə, Rumıniya, Rusiya və başqa ölkələrdə uğurla çıxış edib.
O dəflərlə Latviyada çıxış etdiyindən latviyalı musiqisevərlər Fuad İbrahimovun sənəti ilə artıq tanışdır. Latviya Milli Simfonik Orkestri Baltikyanı ölkələrin ən yaxşı simfonik kollektivi kimi tanınır. Onun fəaliyyəti miqyası, repertuarı, təqdim etdiyi əsərlərin üslub spektri zənginliyi ilə seçilir. 1926-cı ildə yaradılmış bu orkestrin baş dirijoru hazırda Andris Poqadır. Ötən mövsümdə orkestrin pultu önünə Vasili Sinayski, Vladimir Fedoseyev, Jan-Klod Kazadezyus kimi məşhur dirijorlar çıxıb.
