Vokalçılarımız Latviyada uğura imza atdılar - FOTO
Latviyanın paytaxtı Riqada hər il olduğu kimi, bu il də gənc vokalçıların “Riga Symphony” adlı müsabiqə-festivalı keçirilib.
Rakus.az xəbər verir ki, səkkizinci dəfə təşkil olunan bu müsabiqəyə 21 ölkəni təmsil edən 300 nəfərdən çox iştirakçı qatılıb. Müsabiqə 5-25 yaşarası vokalçılar üçün bütün mümkün nominasiyalar üzrə keçirilir. Burada vokal sənətinin əsas istiqamətləri – akademik vokal, jazz, pop, xalq ifaçılığı təmsil olunub. Bu il “Diamond voice” nominasiyası, habelə xor və ansambl ifaçılığı üzrə yarışma da ümumi proqrama əlavə olunub.
Müsabiqənin “Gənc istedadların kökləri” nominasiyası isə valideynləri öz bacarığını sərgiləmək imkanı yaradacaq.
Festivalın yaradıcısı və bədii rəhbəri, bəstəkar, pedaqoq, prodüser, “Pumpurini” uşaq vokal və rəqs studiyasının direktoru Helena Lorena Şvilpedir.
Ölkəmizi bu müsabiqədə İsgəndər Həsənzadə, Nəzrin Həsənzadə və Nəfisə Akiyeva təmsil edib. Təmsilçilərimiz bu dəfə də müsabiqənin qızıl və bürünc medalını əldə ediblər.
Azərbaycanın Latviyadakı səfirliyində təşkil olunan görüşdə səfir Cavanşir Axundov gənc ifaçıları uğurlu çıxışları münasibətilə təbrik edib, onlara yeni yaradıcılıq axtarışlarında uğurlar arzulayıb.
Səfir vurğulayıb ki, bu gün Azərbaycanda gənclərin təlim-tərbiyəsi, ən yaxşı təhsil ocaqlarında oxuması üçün yaxşı şərait yaradılıb. Sonda gənc artistlərə xatirə hədiyyələri təqdim olunub.
Müsabiqənin münsiflər heyətində təmsil olunan Ü. Hacıbəyli adına Bakı Musiqi Akademiyasının professoru, Əməkdar İncəsənət xadimi Zümrüd Dadaşzadə təəssüratlarını bölüşərək deyib: “Mənim bu gözəl müsabiqəyə qatılmağımda müəyyən qanunauyğunluq var. “Simfoniyanın fəzası” kitabımda mən 60-80-ci illər Azərbaycan simfoniyasının inkişafında əsas təmayülləri nəzərdən keçirirəm. “Simfoniya” sözü “həmsəda” kimi tərcümə olunur. Riqada elə müxtəlif sədaların ahənginin şahidi olduq. Müxtəlif dillər, ənənələr, üslublar, temperamentlərin bir araya gəlməsi əsrarəngiz polifoniya yaratdı. Mən “Riga Symphony” müsabiqəsini Şərq xalçası ilə də müqayisə edərdim. Bu xalçanın hər bir naxışı gözəl və orijinaldır. Bir yerdə həmin naxışlar valehedici al-əlvan panno əmələ gətirir. Festivala İtaliya, Rusiya, Çexiya, Qazaxıstan, Belarus, Litva, Bolqarıstan, Portuqaliya, Polşa, Kuba, Moldova, Ukrayna, Estoniya, Malta və başqa ölkələri təmsil edən ali peşəkarlar təşrif buyurmuşdu. Önəmlidir ki, onların əksəriyyəti iştirakçıları öz müsabiqələrində görmək arzusunu ifadə etdilər”.
