YAP təşkilat sədrinin həbsinə münasibət bildirdi
Bu gün ölkə gündəmini Ağstafa rayonunun icra başçısı Nizaməddin Quliyev və birinci müavini Ramiz Tatarovun həbs edilməsi xəbəri silkələdi. Xüsusilə, Ramiz Tatarovun hakim Yeni Azərbaycan Partiyasının Ağstafa rayon təşkilatının sədri olması mətbuatda müzakirələrə səbəb oldu.
Bu barədə partiyanın mövqeyini açıqlayan YAP İcra Katibliyinin Siyasi təhlil və proqnozlaşdırma şöbəsinin müdiri, deputat Aydın Mirzəzadə söyləyib ki, sözügedən həbs partiyanın imicinə heç bir xələl gətirmir:
“Hər iki şəxsin həbsi göstərir ki, qanun hamıya eyni münasibət göstərir. Qanunu pozan hər kəs öz cəzasını alacaq. Hansı postu tutmasından, hansı vəzifədə olmasından asılı olmayaraq. Mən əksinə, düşünürəm ki, bu hadisə partiyanın nüfuzunu qaldıracaq. Göstərir ki, biz heç kəsin əməlini müdafiə etmək fikrində deyilik. Əgər kimsə hüquq qarşısında cavab verməlidirsə, buyursun, cavabını versin. Əksinə partiya belələrindən xilas olacaq”.
A.Mirzəzadə xatırladıb ki, vaxtilə YAP-ın İdarə Heyətinin üzvü olan, sabiq səhiyyə naziri Əli İnsanov da korrupsiyaya görə həbs edilmişdi:
“YAP Siyasi Şurasının üzvləri olan Fərhad Əliyev, Akif Muradverdiyev də həbs edilmişdi. Bu göstərir ki, partiya ölkənin və partiyanın imicinə zərər gətirə biləcək istənilən adama qarşı qanunun ən sərt formada tətbiq edilməsinin tərəfdarıdır”.(modern)
