Rusiyadan Ermənistana zenit-raket kompleksləri gətirildi
Ermənistan ordusunun silahlanmasına Rusiya istehsalı olan ən yeni “Tor-M2KM” zenit-raket kompleksləri daxil olub.
Rakus.az xəbər verir ki, bu barədə baş nazir Nikol Paşinyan “Facebook” səhifəsində açıqlayıb.
Daha sonra Paşinyan hərbi hissələrdən birində “Tor-M2KM” kompleksləri də daxil olmaqla bəzi yeni hərbi texnikanın silahlanmaya qəbul edilməsində iştirak edib.
“Ermənistan silahlı qüvvələri Rusiya istehsalı olan ən yeni hava hücumundan və raketdən müdafiə sistemləri ilə silahlandı. Silah 2019-cu ildə buraxılıb. Bu, 2019-cu ildə əldə etdiyimiz ən mühüm silahlardan biridir. Onun miqdarını deyə bilmərəm, hərbi sirdir”,- Paşinyan yazıb.
“Tor-M2KM” hava hücumundan müdafiəni həyata keçirir, habelə hərbi bölmələri pilotsuz uçuş vasitələrindən və yüksək dəqiqlikli silahlardan müdafiə edir. “Almaz-Antey” korporasiyası tərəfindən istehsal edilir. Kompleks eyni anda 20 hava hədəfini izləyir və onlardan 4-ünü eyni vaxtda vura bilər. Hədəfin izlənməsi və vurulması avtomatik rejimdə həyata keçirilir.
Xatırladaq ki, bundan əvvəl Rusiya Ermənistana güzəştli qiymətə və kredit hesabına 4 Su-30SM qırıcısı da verib. Həmin qırıcılar bu günlərdə Ermənistana çatdırılmalı idi.
