“Liverpul” və “Tottenhem” qələbə qazandı - FOTO - VİDEO
UEFA Çempionlar Liqasının 2018-2019-cu illər mövsümünün dörddəbir final mərhələsinə aprelin 9-da start verilib.
Rakus.az xəbər verir ki, ilk oyun günündə iki qarşılaşma keçirilib.
Turnirin son finalçısı İngiltərənin “Liverpul” komandası doğma azarkeşlər önündə Portuqaliyanın “Porto” klubunu qəbul edib.
Görüş meydan sahiblərinin 2:0 hesablı qələbəsi ilə başa çatıb. Yurgen Klopun yetirmələrinin heyətində Nəbi Keyta (5) və Roberto Firmino (26) fərqləniblər.
Bu komandalar ardıcıl ikinci mövsüm UEFA Çempionlar Liqasında qarşılaşıblar. İngilislər ötən mövsüm səkkizdəbir final mərhələsində rəqibini səfərdə Sadio Manenin het-triki və Məhəmməd Salahla Roberto Firminonun qolları ilə 5:0 hesabı ilə məğlub edib. “Enfild”dəki görüşdə isə hesab açılmayıb.
Xatırladaq ki, “Liverpul” səkkizdəbir finalda Almaniya təmsilçisi “Bavariya”nı mübarizədən kənarlaşdırıb (0:0, 3:1). “Portu” isə “Roma” (İtaliya) səddini adlayıb (1:2, 3:1).
Günün digər oyununda iki ingilis klubu qarşılaşıb. “Tottenhem” və “Mançester Siti” komandaları tarixlərində ilk dəfə avrokubokda üz-üzə gəlib.
“Tottenhem Hotspur”da baş tutan görüşdə London təmsilçiləri minimal hesabla qələbə qazanıb – 1:0. Görüşdə yeganə qolun müəllifi 78-ci dəqiqədə Heung-Min Son olub. Matçın 13-cü dəqiqəsində “Mançester Siti”nin hücumçusu Serxio Aquera 11 metrlik cərimə zərbəsini yerinə yetirə bilməyib.
Xatırladaq ki, hər iki kollektiv səkkizdəbir finalda Almaniya təmsilçisini mübarizədən kənarlaşdırıb. Londonlular “Borussiya Dortmund”dan (3:0, 1:0), “şəhərlilər” isə “Şalke”dən (3:2, 7:0) üstün olublar.
1/4 final mərhələsinin daha iki ilk oyunu aprelin 10-da keçiriləcək. Hollandiyada “Ayaks” İtaliya “Yuventus”unu, İspaniyada isə “Barselona” İngiltərə “Mançester Yunayted”ini qəbul edəcək. Cavab görüşləri 16-17 apreldə olacaq.
Çempionlar Liqası
1/4 final, ilk oyunlar
23:00. “Tottenhem” (İngiltərə) – “Mançester Siti” (İngiltərə) – 1:0
Qol: Son Hın Min, 78
Dəqiq yerinə yetirilməyən penalti: Serxio Aquero, 13 (“Mançester Siti”)
Baş hakim: Byorn Keypers (Hollandiya)
London. “Tottenhem” stadionu
23:00. “Liverpul” (İngiltərə) – “Portu” (Portuqaliya) – 2:0
Qollar: Nəbi Keyta, 5. Roberto Firmino, 26
Baş hakim: Antonio Mateu Laos (İspaniya)
Liverpul. “Enfild” stadionu.
