Narınc Xatunun xatirəsinə konsert keçirildi – foto - FOTO
Beynəlxalq Muğam Mərkəzində “Aşıq Pəri” məclisinin qurucusu, Əməkdar mədəniyyət işçisi Narınc Xatunun xatirəsinə həsr olunmuş konsert proqramı keçirilib.
Rakus.az xəbər verir ki, konsert “Aşıq musiqisi axşamları” layihəsi çərçivəsində təşkil olunub.
Gecədə çıxış edən folklorşünas, Əməkdar mədəniyyət işçisi Elxan Məmmədli bildirib ki, 1984-cü ildə Xalq şairi Hüseyn Arif və Narınc Xatun belə bir məclisin ərsəyə gəlməsini qərara alıblar. Aşıq Ulduz, aşıq Solmaz və digərləri Borçalını qarış-qarış gəzərək orada yaradıcı xanımları axtarıb tapıblar. Bütün Azərbaycan Göyçə şairləri haqda məlumatlanıb və getdikcə məclis böyüməyə başlayıb. İllər boyu bu məclisə unudulmaz sənətkarımız Narınc Xatun rəhbərlik edib. Lakin Hüseyn Arifin də, Zəlimxan Yaqubun da diqqəti daim bu məclisin üzərində olub. Məclisdə çox böyük istedadlar yetişib. Belə ki, qadın aşıq sənəti qədim qaynaqlara söykənir. Bir çox dastanlarda kişilərlə meydanda deyişən qadın aşıqlar haqqında məlumatlar var.
“Aşıq Pəri” məclisinin bədii rəhbəri, şair-publisist Güllü Eldar Tomarlı çıxış edərək deyib: “Narınc Xatunun səsini-sədasını çox eşitmişdim. Sinəsində bir şair ürəyi döyünürdü, qəlbində poeziyaya abidə ucaltmışdı. Məclislərdə ozan dədələr, ustad aşıqlar onun sözünə köklənərdilər, havalarını-havacatlarını onun ruhuna uyğun bəstələyərdilər. Onun işığına, ziyasına neçə-neçə sənət vurğunları axıb gəlib. Bu ocaq “Aşıq Pəri” məclisi adı ilə dillərdə dastan olub. İl üstə il gəldikcə, zaman üstə zaman calandıqca “Aşıq Pəri” məclisinin səsi-sədası ellərdən-ellərə, ölkələrdən-ölkələrə yayılıb”.
Bildirib ki, “Aşıq Pəri” məclisinin daha güclü olması üçün Narınc Xatun yaradıcılığına üz tutmaq, yaradıcılığından bəhrələnmək lazımdır. Narınc Xatun “Aşıq Pəri” məclisində sazın-sözün ahəngini yaradıb, sazla sözü qoşalaşdırıb. Onun səyyar xəyalı Borçalını, Təbrizi, güneyli-quzeyli Azərbaycanı dolaşıb. Dolaşdıqca yeni-yeni incilər tapıb, üzə çıxarıb. Onları təsbeh kimi bir sıraya düzüb və durna qatarı kimi göy üzünə pərvazlandırıb.
Sonra söz “Aşıq Pəri Məclisi”nin sədri, şairə Pərvanə Zəngəzurluya verilib. O da Narınc Xatunun Azərbaycan aşıq sənətinin təbliği, xüsusilə də qadın aşıqlarımızın tanıdılması yolunda əvəzsiz xidmətlərindən danışıb. Bildirib ki, Narınc Xatunun böyük zəhməti sayəsində yaradılan “Aşıq Pəri” məclisi ötən müddət ərzində şərəfli yol keçib və bu gün də öz ənənəsinə sadiq qalaraq Azərbaycan xalqının saz və söz sənətinin təbliğinə öz töhfəsini verməkdədir.
“Aşıq Pəri” məclisinin “Azərbaycan qadın aşıqları” silsiləsindən olan tədbirində ədəbiyyat, incəsənət, mədəniyyət xadimləri və ictimaiyyət nümayəndələri iştirak ediblər. Gecədə Narınc Xatunun şeirləri səsləndirilib və qadın aşıqların ifasında el havaları dinlənilib.
Xatırladaq ki, Narınc Xatun 1930-cu ildə Neftçala rayonunda anadan olub. İlk şeirləri orta məktəb illərində yerli mətbuatda dərc edilib. Aşıq Mikayıl Azaflı ilə birlikdə “Azaflı və Narınc Xatun dastanı” yaradıblar. Şairin “Burla xatun nəvəsiyəm” adlı şeirlər toplusu 2002-ci ildə işıq üzü görüb. XX əsrin sonlarına yaxın Narınc Xatun Aşıq Pərinin xatirəsini yaşatmaq üçün “Aşıq Pəri” yaradıcılıq məclisini yaradıb. Narınc Xatun uzun illər Azərbaycan Aşıqlar Birliyinin nəzdindəki “Aşıq Pəri” məclisinə rəhbərlik edib.
