BNA avtobus sürücüləri ilə bacarmır - FOTO - VİDEO
Bakının yollarında yaranan tıxacların böyük səbəblərindən biri də avtobus sürücülərinin qaydalara düzgün əməl etməməsidir. Bu barədə konkret faktlar əsasında bir neçə dəfə yazmağımıza və Bakı Nəqliyyat Agentliyinin məsələni araşdırmasına və tapşırıqlar verməsinə baxmayaraq hələ də problem aradan qaldırılmayıb. Bu səbəbən də paytaxtın onlarla qəsəbəsi ilə mərkəzi birləşdirən Zabrat yolunda demək olar ki, günün əksər hissəsində tıxac olur. Səhərlər isə bu yolda saatlarla qalmalı olursan.
Məlumat üçün qeyd edək ki, uzun illər boyu davam edən bu problemi aradan qaldırmaq üçün Respublika Prezidenti İlham Əliyev tərəfindən burada yerüstü körpünün tikiltisinə vəsait ayrıldı və nəzərdə tutulan işlər həyata keçirildi. Lakin əfsuslar olsun ki, bununla belə tıxacı aradan qaldırmaq mümkün olmayıb. Çünki bu istiqamətlər üzrə hərəkət edən marşrut avtobuslarının sürücüləri qaydalara əməl etmirlər. Onlar tıxacın yaranmasına səbəb olmaqla yanaşı, həm də sakinlərin təhlükəsizliyinə ciddi maneə törədirlər.
Rakus.az saytı əməkdaşlarının hadisə yerində apardığı çəkiliş buna əyani sübutdur. Göründüyü kimi, yerüstü körpüdən təxminən 50 metr aralıda müasir dayanacaq quraşdırılıb. Ancaq avtobus sürücüləri onlar üçün nəzərdə tutulan yerdə deyil, körpünün birbaşa altında saxlayır, tıxac və nəqliyyat üçün təhlükə yaradırlar. Maraqlıdır ki, bu çəkilişlər 3 ay əvvəl çəkilsə də heç nə dəyişməyib, indiki çəkilşlə tam eynidir.
Bununla bağlı tənqidi yazımıza agentlikdən bu ilin yanvarın 30-da verilən cavabda (məktubu sənədlərlə iş və insan resursları şöbəsinin müdir müavini Sehmur Quliyev imzalayıb) bildirildi:
“Qeyd etdiyiniz xüsusatla bağlı daşıyıcılarla mütəmadi görüşlər keçirilir. Daşıyıcılara tərəfimizdən sürücülərin etik davranış və yol hərəkəti qaydalarına əməl edilməsi yönündə maarifləndirmə tədbirlərinin keçirilməsinin vacibliyi bildirilir.
Eyni zamanda sürücülərə təlim mərkəzində təlimlər keçirilir. Davranışlarından davamlı şikayət olan sürücülərin əmək müqavilələrinə xitam verilir.
Xahiş edirik nəzərə alasınız”.
Rakus.az agentlik rəsmisinin xahişini 2 ay 17 gündür nəzərə alır, amma sürücülər yox. Fakt isə faktlığında qalır. Nə tədbir görən var, nə də tənqiddən nəticə çıxaran.
Bu konkret olaraq onu göstərir ki, sürücülər Bakı Nəqliyyat Agentliyinin tapşırıqlarını nəzərə almır, agentlik isə onlarla bacarmır. Görəsən nə vaxtadək ?!
Mikayıl Nərimanoğlu,
Əməkdar jurnalist
