Milli Şuranın mitinqi olmayacaq
Bakı şəhər İcra Hakimiyyəti Milli Şuranın aprelin 20-nə təyin etdiyi mitinqi məqsədəuyğun saymayıb.
Rakus.az xəbər verir ki, bu barədə AXCP sədrinin müavini Gözəl Bayramlı Amerikanın Səsinə bildirib.
Milli Şura aprelin 4-də mitinq keçirmək barədə qərar qəbul etmişdi. Mitinqin siyasi məhbuslara azadlıq, korrupsiya yolu ilə ölkədən oğurlanmış, xalqdan talan edilmiş vəsaitlərin geri qaytarılması, hazırda əhalinin böyük ehtiyac duyduğu uşaq pullarının verilməsi və digər tələblərlə keçiriləcəyi bildirilmişdi.
Bakı Şəhər İcra Hakimiyyəti Demokratik Qüvvələrin Milli Şurasının fevralın 23-də, martın 2-də, aprelin 6-da, Müsavat Partiyasının martın 10-da və aprelin 7-də keçirmək istədiyi aksiyalara razılıq verməyib.
Milli Şura yanvarın 19-da Bakıda “Məhsul” stadionunda Mehman Hüseynov və bütün siyasi məhbuslara azadlıq, ölkədən oğurlanıb ofşor zonalarda yerləşdirilmiş korrupsiya pullarının xalqa qaytarılması tələbi ilə mitinq keçirmişdi.
Minlərlə insanın qatıldığı mitinqdə Müsavat, REAL partiyalarının təmsilçiləri, məhbus ailələrinin nümayəndələri çıxış etmişdi.
Mitinqdə “Azadlıq!” “İstefa!” “Mehman Hüseynov və siyasi məhbuslara azadlıq!” şüarları səsləndirilmiş, “Bu vətən bizimdir!” “Siyasi məhbuslara azadlıq!” “Mehman Hüseynova azadlıq!” “Biz qalib gələcəyik!” və başqa şüarlar qaldırılmışdı. İştirakçılar həmçinin Mehman Hüseynov və digər siyasi məhbusların portretlərini qaldırıb.
Aksiyada daha geniş meydanlara, o cümlədən “Azadlıq” meydanına yürüş üçün çağırışlar edilmişdi.
