Müəllimlərə hansı suallar verilməyəcək?
“Müəllimlərin işə qəbulu ilə bağlı müsabiqəsinin tarixi məlum deyil. Dünyada koronavirus pandemiyası var və vəziyyətin hara getdiyini bilmirik”.
Rakus.az xəbər verir ki, bunu Oxu.Az-a açıqlamasında Təhsil İnstitutunun Təhsil İşçilərinin Peşəkar İnkişafı Mərkəzinin direktoru Nəzakət Mehdiyeva bildirib.
Onun sözlərinə görə, müsabiqədə iştirak edən namizədlər məntiqdən imtahan verməyəcək: “Bunun əvəzində isə ixtisas fənni, metodika və pedaqogikadan imtahan verəcəklər. Əvvəllər metodika və pedaqogikadan birlikdə 10, məntiqdən də 10 sual düşürdü. İndi onun yerinə metodika və pedaqogikadan 20 sual olacaq”.
Direktor qeyd edib ki, suallar üç əsas sahəni əhatə edir: “Metodiki bacarıqlar, pedaqoji bacarıqlar və təhsil qanunvericiliyidir. Təhsil qanunvericiliyində qanunverici sənədlər və sair sual olacaq. Metodiki bacarıqlardan doqquz, pedaqoji qabiliyyətdən səkkiz, təhsil qanunvericiliyindən üç sual ola bilər”.
