Türkiyəli gəncə Azərbaycan bayrağı hədiyyə olundu - FOTO
Dünya bayraqlarının kolleksiyasını toplayan 15 yaşlı Türkiyə vətəndaşı Ali Mert Tunçun Azərbaycana xüsusi sevgisi var. Bu marağa və bu sevgiyə görə o, Azərbaycan Müdafiə Nazirliyinə müraciət edərək Azərbaycan bayrağının ona hədiyyə edilməsini xahiş edib.
Rakus.az xəbər verir ki, nazirliyin məlumatına görə, Müdafiə nazirinin tapşırığına əsasən, Azərbaycan Silahlı Qüvvələrinin Türkiyədəki Hərbi attaşesi polkovnik Müşfiq Məmmədov ölkəmizin Ankara şəhərindəki səfirliyində Ali, onun kiçik bacısı Defne Zeren və uşaqların valideynləri – atası Tunç Ali Kemal və anası Tunç Kevser ilə görüşüb. Səmimi görüş qonaqlara xoş təsir bağışlayıb.
Görüşdə Azərbaycan və Türkiyə dövlətləri arasında münasibətlərin tarixindən, mədəniyyətindən, qarşılıqlı əlaqələrin inkişafından, ümummilli lider Heydər Əliyevin söylədiyi kimi “Bir millət, iki dövlət” formatında əməkdaşlığımızdan bəhs edilib.
Görüşün sonunda Aliyə Azərbaycan Respublikasının Dövlət Bayrağı, ailə üzvlərinin hər birinə isə ölkəmizə məxsus müxtəlif hədiyyələr təqdim olunub.
Qonaqlar müraciətə qısa zamanda baxıldığına, Azərbaycanın Ankaradakı səfirliyinə dəvət olunduqlarına və burada şahidi olduqları səmimiyyətə, mehribanlığa görə dərin təşəkkürlərini bildiriblər.
Tunç Ali Mert və ailə üzvləri COVID-19 virusu bitdikdən sonra, Azərbaycana gəlmək arzusunda olduqlarını bildiriblər.
