Toyxanalar yenə açılmadı – RƏSMİ
“İctimai iaşə obyektlərində, açıq havada şənliklərin keçirilməsini nəzərdə tutmuruq”.
Rakus.az xəbər verir ki, bunu İqtisadiyyat Nazirliyi yanında Dövlət Vergi Xidmətinin rəis müavini Samirə Musayeva Nazirlər Kabineti yanında Operativ Qərargahın brifinqində bildirib.
Onun sözlərinə görə, toylar kütləvi şənliklər kateqoriyasındadır və masa arxasında yalnız qida qəbul edərkən maskaların çıxarılmasına icazə verilir: “Digər hallarda isə maskasız bir yerə toplaşmamaq, 1,5-2 metrlik ara məsafəsi saxlanılması kimi digər ümumi qəbul olunmuş qadağaların tərkibində olduğuna görə toyların keçirilməsinə icazə verməyi nəzərdə tutmuruq”.
O deyib ki, iyulun 3-dən 14 509 nəzarət tədbiri həyata keçirilib. Nəticədə 1 708 pozuntu halı müəyyənləşib. “Bu isə ümumi yoxlamanın 11,8%-ni təşkil edir. Burada müsbət tendensiya müşahidə olunur. Məsələn, ilk iki həftədə 25-30%-də pozuntu aşkarlanırdısa, indi 11,8%-ə edib”.
Sahibkarlıq subyektlərinə maliyyə yardımı ilə bağlı 2-ci mərhələdə fərdi və mikro sahibkarlara 250 manat maliyyə dəstəyinin göstərilməsi hissəsi başa çatıb.
Onun sözlərinə görə, bu çərçivədə 49,3 min fərdi və mikro sahibkara 12,3 milyon manat vəsaitin ödənilməsi təmin edilib: “Pandemiyadan əziyyət çəkən sahələrdə çalışan muzdlu işçilərə maliyyə yardımı edilməsi ilə bağlı təhlillər aparılıb və artıq siyahılar hazırlanıb, Maliyyə Nazirliyinə təqdim olunub”.
S.Musayeva qeyd edib ki, sahibkara muzdlu işçilərinə görə əmək haqqının müəyyən hissəsinin ödənilməsi nəzərdə tutulub: “Belə ki, avqust-sentyabr aylarında 1 aylıq əmək haqqı fondunun ödənilməsi təmin ediləcək”.
“Fəaliyyətinə icazə verilən ictimai iaşə obyetlərinin daxilində sanitar qovşaqdan istifadə ilə bağlı qadağa müəyyən edilməyib”.
O bildirib ki, hər bir sahibkar sanitar qaydalara əməl etməli, dezinfeksiya vasitələrindən istifadə etməlidir:
“Sanitar qovşaqla bağlı xüsusi qeydin olmamasına baxmayaraq, istənilən sahibkarlıq subyektində ara məsafənin qorunması tələbi müəyyən olunub. Həmin tələblərin qorunması şərti ilə hansısa iaşə obyektində sanitar qovşağın fəaliyyət göstərməməsi ilə bağlı hansısa qeyd müəyyənləşməyib”.
İyunun 30-dan etibarən fəaliyyət göstərən Rəqəmsal Kredit Platforması vasitəsi ilə 500 mln manat məbləğində yeni bank kreditləri üzrə dövlət zəmanətlərinin verilməsi nəzərdə tutulub.
Onun sözlərinə görə, artıq iyul ayının 25-dən sahibkarlara kreditin alınması ilə bağlı eyni vaxta 3 bank seçmək imkanı verilir.
Xatırladaq ki, Nazirlər Kabinetinin Azərbaycan Respublikası Prezidentinin 2020-ci il 4 iyun tarixli 1052 nömrəli Fərmanının 3.1-ci bəndinin icrasını təmin etmək məqsədilə “Koronavirus (COVID-19) pandemiyasından zərər çəkmiş sahələrdə fəaliyyət göstərən sahibkarlıq subyektlərinə veriləcək bank kreditləri üzrə dövlət zəmanətinin verilməsi və kredit faizlərinin subsidiyalaşdırılması Qaydası”nı və Qərarın 1-ci hissəsi ilə təsdiq edilmiş Qaydaya uyğun olaraq sahibkarlıq subyektləri tərəfindən alınacaq kreditlər 300 milyon manat məbləğinədək dövlət zəmanəti ilə təmin edilməsi nəzərdə tutulub. Sahibkarlıq subyektləri tərəfindən alınacaq kreditlərə dövlət zəmanətinin verilməsi 2021-ci il dekabrın 31-dək həyata keçiriləcək.
