Abşeron rayonu üçün 2019-cu il uğurlu oldu - FOTO
2019-cu il Abşeron rayonu üçün uğurlu olub.
2017-ci ilin iyul ayından Azərbaycan Hökuməti və Səudiyyə İnkişaf Fondunun birgə maliyyəsi ilə həyata keçirilən “Xırdalan şəhərinin su təchizatı və kanalizasiya sistemlərinin tikintisi işlərinə bağlanılmış, bu günə qədər “Azərsu” ASC-nin sifarişi əsasında podratçı təşkilatlar tərəfindən nəzərdə tutulmuş işlərin 95 faizə qədəri görülmüşdür. Belə ki, iş başlanandan 168.5 km uzunluğunda müxtəlif diametrli içməli su xətti, tutumu 10 min kubmetr olan 2 anbar, 86.2 km uzunluğunda kanalizasiya xətti çəkilib. Xırdalan şəhərinin kanalizasiya sularını kənarlaşdırmaq üçün 1200 mm diametrli 4.2 km uzunluğunda magistral xətt çəkilmiş və mərkəzi nasosxananın yenidən qurulması işlərinə başlanılmışdır.
Azərbaycan Respublikasının Prezidenti cənab İlham Əliyev tərəfindən verilmiş tapşırıqlara uyğun olaraq Abşeron rayonunun kənd təsərrüfatı torpaqlarında zeytun və badam bağları sahələrinin genişləndirilməsi və aqropark yaradılması istiqamətində çox böyük layihə həyata keçirilir.
Xəzər və Suraxanı rayonlarının Abşeron rayonuna təhkim olunmuş kənd təsərrüfatı təyinatlı torpaqlarında “Grand Aqro” MMC tərəfindən 3570 hektar sahədə aqropark yaradılması istiqamətində işlər sürətlə davam etdirilir. Bu günə qədər 39.2 km uzunluğunda su xətti çəkilmiş, ümumi sahəsi 230 min kubmetr olan 6 su hovuzu, nasosxana inşa olunmuş, 1312 ha sahədə damlama üsulu ilə suvarma sistemi quraşdırılmış, 30 ədəd texnika alınmışdır. Hazırda laboratoriya və istixana binalarının inşasında son tamamlama işləri görülür.
2018-ci ildə 161 hektar sahədə badam, 2019-cu ilin yazında isə 287 ha sahədə zeytun və 96 sahədə badam bağı salınmışdır. Ümumi meyvə sahəsi 1312 hektardır. Ötən il əkilmiş badam sahəsindən bu il 30 ton məhsul yığılmışdır.
Layihənin icrasına 30.4 milyon manat vəsait sərf edilmişdir.
Azərbaycan Respublikası Kənd Təsərrüfatı Nazirliyinin Xırdalan şəhəri ərazisində Dövlət Aqrar İnkişaf Mərkəzi üçün bina tikilərək istifadəyə verilmişdir.
