Abşeron rayonunda Könüllülər Günü qeyd olundu - FOTO
Rakus.az xəbər verir ki, Xırdalandakı Mədəniyyət Mərkəzində təşkil olunan görüşdə çıxış edən Abşeron Rayon İcra Hakimiyyətinin başçısı İradə Gülməmmədova Azərbaycanda geniş vüsət alan könüllülük hərəkatının əsasının ümummilli lider Heydər Əliyev tərəfindən qoyulduğunu və hazırda Prezident İlham Əliyev tərəfindən uğurla inkişaf etdirildiyini vurğulayıb. Respublikamızda keçirilən beynəlxalq tədbirlərdə, eləcə də dövlət orqanlarının gündəlik fəaliyyətində könüllülərin böyük rol oynadıqlarını diqqətə çatdıran icra başçısı bildirib ki, bu ilin dördüncü rübündə Abşeron Rayon İcra Hakimiyyətinə könüllülük fəaliyyəti ilə əlaqədar 180-ə yaxın gənc müraciət edib, onlardan 70-i 3 ay müddətində könüllülük fəaliyyətinə cəlb olunub.
Könüllülərin bir neçəsinin rayon icra hakimiyyətində işlə təmin olunduğunu vurğulayan İ.Gülməmmədova əlavə edib ki, onlar üçün pulsuz ingilis dili kursu da təşkil olunub.
2017-ci ilin dekabrında rayonun bir qrup könüllüsü tərəfindən “Facebook” sosial şəbəkəsində “Milli amal” qrupunun yaradıldığını və onun üzvlərinin sayının artıq 7 minə yaxın olduğunu qeyd edən icra başçı bildirib ki, qrupun məqsədi ümummilli lider Heydər Əliyevin Azərbaycan üçün gördüyü misilsiz işləri, Prezident İlham Əliyevin həyata keçirdiyi daxili və xarici siyasəti, ölkəmizdə aparılan abadlıq-quruculuq və yenidənqurma işlərini, Heydər Əliyev Fondunun xeyriyyəçilik fəaliyyətini, Birinci vitse-prezident xanım Mehriban Əliyevanın həyata keçirdiyi layihələri, eləcə də rayon ərazisində görülən tədbirləri təbliğ və təşviq etməkdir.
Sonra rayonun ictimai-siyasi həyatında fəal iştirak edən könüllülərə və könüllük fəaliyyətinin təşkil olunmasına məsul şəxslərə fəxri fərman və qiymətli hədiyyələr təqdim edilib.
Tədbir tanınmış incəsənət ustalarının konsert proqramı ilə davam edib. (Azərtac)
