AÇ-də yeni mövsümündə 8 komanda oynayacaq
Oktyabr ayının 9-da həndbol üzrə növbəti Azərbaycan çempionatına start veriləcək.
Rakus.az xəbər verir ki, XXVII dəfə keçiriləcək yarışlarda 8 komanda gücünü yoxlayacaq.
Kişilərin çempionatında “Məhsul”, “Bakı”, “Təhsil” və U-18 qələbə uğrunda mübarizə aparacaq. Qadınların yarışında isə “Azəryol”, “Azərsu”, “Qarabağ” və “İdman Akademiyası” kollektivləri qüvvəsini sınayacaq.
Azərbaycan çempionatı oktyabrın 9-da, saat 13:00-da “Azərsu” – “Azəryol” görüşü ilə başlanacaq. Həmin gün saat 15:00-da “Qarabağ” “İdman Akademiyası” ilə üz-üzə gələcək.
Kişilərdən ibarət komandaların mübarizəsinə isə oktyabrın 12-də start veriləcək. Həndbol həvəskarları ilk turda “Təhsil” – “Məhsul” və “Bakı” – U-18 qarşılaşmalarını izləyə bilərlər. Görüşlər müvafiq olaraq, 17:00 və 19:00-da başlanacaq.
Qeyd edək ki, Azərbaycan çempionatının 2019/2020 mövsümünün oyunları “ABU Arena”da keçiriləcək.
