Siyasi 29.11.2023 00:34

Ardanış kənd icmasına sədr və İdarə Heyəti seçilib- SİYAHI - FOTO

Ölçü

A+ A- A

Noyabrın 28-də Qərbi Azərbaycanın Göyçə mahalının Çəmbərək rayonunun Ardanış kənd İcmasının növbəti iclası keçirilib.

Rakus.az xəbər verir ki, “Şahənşah” Şadlıq Sarayında keçirilən iclasda Çəmbərək Rayon İcmasının sədri Əvəz Ələkbərov iştirak edib.

İclasda Qərbi Azərbaycan İcmasının (QAİ) Qəyyumlar Şurasının üzvü, iş adamı Rəşid Süleymanov icma üzvlərini salamlayıb, kənd icma sədrlərinin seçilmə mexanizmi barədə məlumat verib.

Ardanış kənd İcmasının noyabrın 22-də keçirilmiş ilk iclasda təklif olunmuş 21 nəfərdən ibarət İdarə Heyətinin seçilməsi müzakirələrə təqdim olunub və təsdiqlənib.

Rayon icma sədri Ə.Ələkbərov çıxışında Azərbaycan dövlətinin Qərbi Azərbaycanla bağlı siyasətini təqdir edərək, QAİ-nin xətti ilə qarşıya qoyulan vəzifələrdən söz açıb, Əsasnaməyə əsasən kənd icmalarının seçilmə hüququnun rayon icma sədrinin səlahiyyətində olduğunu bildirib.

O, qaydalara uyğun olaraq tanınmış cərrah, professor Məhəmməd Kərimovun namizədliyini irəli sürüb və deyib ki, demokratik prinsipləri nəzərə alaraq İdarə Heyəti üzvlərinin razılığı ilə kənd icma sədrinin seçilməsi daha məntiqli addım olar.

İdarə Heyətinin üzvləri Tanrıverdi Paşayev, Səməd Axundov, Əli Vəliyev, Əlövsət Kərimov, Əsgər İbrahimov, Daşdəmir Əliyev və başqaları məsələyə münasibət bildirərək, tibb elmləri doktoru Məhəmməd Kərimovun doğru seçim olduğunu deyiblər.

Qeyd olunub ki, fleboloq, ürək-damar cərrahı, doktor Məhəmməd Kərimov hazırda Azərbaycan Tibb Universitetinin (ATU) Tədris-Cərrahiyyə Klinikasının Ürək-Damar Cərrahiyyəsi şöbəsinin, eləcə də İ.M.Seçenov adına Birinci Moskva Dövlət Tibb Universitetinin Bakı Filialının cərrahiyyə kafedrasının müdiridir. O, eyni zamanda ATU-nun professorudur və Ümumdünya Damar Cərrahları Assosasiyası, Dünya Fleboloji Forumu, Avropa Cərrahlar Cəmiyyəti, Avropa Damar Cərrahları Assosiasiyası və başqa beynəlxalq cəmiyyətlərin üzvüdür. Vurğulanıb ki, bütün bu titullar icmanın xarici ölkələrdə də tanıdılmasına, ümumi fəaliyyətin daha da genişlənməsinə imkan verəcəkdir.

Beləliklə, yekdil səslə M.Kərimov Ardanış kənd İcmasının sədri seçilib.

Professor Məhəmməd Kərimov çıxış edərək ona göstərilən etimada görə təşəkkür edib, bu ictimai işin öhdəsindən ləyaqətlə gəlmək üçün həm rayon icma sədrinə, həm də kənd icmasının İdarə Heyəti üzvlərinə güvəndiyini, dövlət siyasətinin tərkib hissəsi kimi bu sahədə üzərimizə düşən vəzifələrin öhdəsindən şərəflə gəlməyin hər bir Qərbi Azərbaycanlının borcu olduğunu vurğulayıb. O, qarşıya qoyulan vəzifələrin yerinə yetirilməsi üçün hər kəsin dəstəyinə ehtiyac duyulduğunu, bir çox yeni layihələrin icrasının səmərəli olacağına əminliyini söyləyib.

Sonda Çəmbərək Rayon İcmasının sədri Ə. Ələkbərov icma sədrinin üzərinə düşən vəzifələrdən danışıb, sədr seçilən şəxsin insani keyfiyyətlərinin üstün olmasının, məsuliyyətli, mədəni davranışının. el arasında tanınmasının, hörmətli və intellektual səviyyəsinin üstün olmasının önəmli olduğunu və ümumi işə müsbət təsir göstərəcəyini diqqətə çatdırıb.