AVRO-2020-nin talismanı Bakı gəzintisinə başladı
Bu gün – futbol üzrə Avropa çempionatının başlamasına 100 gün qalmış AVRO-2020-nin rəsmi talismanı, “Skillzi” çempionatın Bakı şəhəri üzrə fristaylerləri – veteran futbolçu Nuqzar Kvirtiya və Kader Alimova ilə birlikdə paytaxt gəzintisinə çıxıb.
Rakus.az xəbər verir ki, Yerli Təşkilat Komitəsindən verilən məlumata görə, “Skillzi” və dostlarının “küləklər” şəhərindəki sərgüzəştləri paytaxt sakinləri tərəfindən böyük maraqla qarşılanıb.
Əlamətdar gündə baş tutan bu gəzinti paytaxta xüsusi rəng qatıb. “Skillzi” və dostları gəzintilərinə Bakının mərkəzindən – Nizami küçəsindən başlayıblar. Daha sonra “küləklər şəhəri”nin tarixi yerlərindən olan İçərişəhərə gedən dostlar Qız qalası, Şirvanşahlar sarayı, Atəşgah, Yanardağ kimi turistik yerlərə, eləcə də bir sıra muzeylərə baş çəkiblər.
Xatırladaq ki, talismanın adı ingilis dilində “bacarıq” mənasını daşıyan “skills” sözündən götürülüb. “Bacarıqlı oğlan” ilk dəfə bu il martın 24-də Niderland və Almaniya arasında matç zamanı təqdim edilib.
A qrupunun 3 oyunu – həmçinin, 1/4 final mərhələsinin 1 qarşılaşması – Bakı Olimpiya Stadionunda keçiriləcək. Püşkün nəticəsinə əsasən, A qrupunda Türkiyə, İtaliya, Uels və İsveçrə milli komandaları yer alıb. Bakıda keçiriləcək oyunların təqvimi:
13 iyun, saat 17:00
Uels – İsveçrə
17 iyun, saat 20:00
Türkiyə – Uels
21 iyun, saat 20:00
İsveçrə – Türkiyə
4 iyul, saat 20:00
¼ final oyunu
(report.az)
