Azərbaycan çempionatında 37 poker qeydə alınıb
Futbol üzrə Azərbaycan çempionatları tarixində indiyədək 37 poker qeydə alınıb.
Rakus.az xəbər verir ki, bir futbolçunun oyunda 4 qol vurmasına daha çox – 7 dəfə 1992-ci ildə təsadüf olunub. 1993-1994-cü və 1995-1996-cı il mövsümlərində 4 belə hadisə yaşanıb. Son 5 mövsümdə isə bunu bacaran olmayıb. Premyer Liqada sonuncu poker 2014-2015-ci il mövsümündə qeydə alınıb. Həmin vaxt AZAL-ın futbolçusu Freddi Mombonqo fərqlənib.
İndiyədək 32 futbolçu poker müəllifi olub. Mütləq rekord Nazim Əliyevə məxsusdur. Dörd müxtəlif mövsümdə bunu gerçəkləşdirən hücumçu 3 klubun heyətində fərqlənib. O, “Neftçi”də 2, “Dinamo” və “Xəzər” klubunda bir pokerə sevinib.
Samir Ələkbərov və Fazil Pərvərovun hesabında 2 belə oyun var. Lakin onlar eyni mövsümdə iki poker müəllifi olmaqla rekorda imza atıblar. S.Ələkbərov 1992-ci ildə “Neftçi”də, F.Pərvərov 1995-1996-cı il mövsümündə “Kəpəz”də belə nailiyyət müəllifi olub. Digər 29 oyunçu hərəyə bir görüşdə 4 qol vurub.
Klublara gəlincə, “Kəpəz”in 7 futbolçusu 8 pokerə imza atıb. İkinci göstərici “Neftçi”dədir. Paytaxt klubunda 3 oyunçu ümumilikdə 5 matçda 4 top vurub. “Turan”ın heyətində üç oyunçu hərəyə bir dəfə fərqlənib. Ümumilikdə, 19 komandanın üzvləri pokerə imza atıb.
