Azərbaycan ordusu dünyaya örnəkdir
Müzəffər Ordumuz Ali Baş Komandanımızın rəhbərliyi altında 30 illik işğalda olan torpaqlarımızı azad etmək missiyasını öz üzərinə götürdü. Müharibə ilk öncə Füzuli rayonunun Qaraxanbəyli kəndini düşməndən azad etməklə başladı. Sentyabrın 27- də ilk qələbəmiz məhz bu kənddən başladı. Ordumuz bu müharibədə şanlı tarix yazdı. Düşmənə layiqli cavabını verdi. Düşməni torpaqlarımızdan qovdu. Bu qələbəyə cənab Prezidentimizin sözləri ilə desək, “Dəmir yumruq” hesabına nail olduq.
Müharibənin ilk günlərindən məqsədimiz hərb meydanında yalnız düşmənə qarşı mübarizə aparmaq olub. Müharibə dövründə düşmənin Gəncədə, Bərdədə, Tərtərdə mülki əhaliyə qarşı törətdikləri cinayətlərə baxmayaraq, biz dinc əhaliyə qarşı müharibə aparmadıq. Ermənilərdən fərqli olaraq biz müharibə dövründə erməni ordusuna qarşı mübarizə apardıq, onları məğlub edərək torpaqlarımızdan qovduq.
Qalib Ordumuz ardıcıl olaraq zəfər yürüşünə başladı, düşməni əzəli torpaqlarımızdan qovdu, tarixi ədaləti bərpa etdi. Azərbaycan Ordusu bütün dünyanı heyran qoyan peşəkarlıq göstərərək 44 günlük müharibədə Xalq – Ordu – Ali Baş Komandan birliyi nəticəsində erməni ordusunun və xalqının iradəsini qıraraq tarixi qələbəyə imza atdı. Ordumuzun sücaəti nəticəsində “güclü erməni ordusu” mifi darmadağın oldu.
Son illərdə Prezidentimizin ordu quruculuğunda apardığı düzgün siyasəti nəticəsində Azərbaycan əsgəri yüksək peşəkarlıq göstərərək bu missiyanın öhdəsindən layiqincə gəldi.
Dünya ölkələri Ali Baş Komandanımızın timsalında əsl lider – döyüş meydanında qalib gələn lider gördülər. Hər açıqlanan şad xəbər Azərbaycan əsgərinin canı, qanı bahasına başa gəldi. Biz fəxr edirik ki, qalib ölkənin qalib vətəndaşlarıyıq. Biz ordumuzla fəxr edirik. Tam əminliklə deyə bilərəm ki, ordu quruculuğunda aparılacaq yeniliklər ordumuzun qüdrətini daha da artıracaq.
Siranə Zeynalova – Salyan şəhər 4 saylı tam orta məktəbin müəllimi
