Azərbaycan vətəndaşları Vilnüsdən Riqaya gəlir - FOTO
Koronavirus səbəbindən Litvada qalan Azərbaycan vətəndaşları ölkəmizə təxliyə edilmək üçün Vilnüsdən Riqaya yola salınıblar.
Rakus.az xəbər verir ki, Azərbaycanın Litvadakı səfirliyinin səyləri nəticəsində bu ölkədə qalan vətəndaşlarımızın təxliyə edilməsi üçün Litva hökuməti xüsusi humanitar dəhliz açıb, pandemiya səbəbindən bağlı olan Litva və Latviya sərhədindən maneəsiz keçirilməsi üçün özəl icazə alınıb.
Litvanın Kaunas, Akmene, Klaypeda, Utena və digər şəhərlərindən 43 nəfər vətəndaşımız Vilnüsdən xüsusi avtobuslarla müvafiq qurumların nəzarəti altında Latviyaya yola düşüblər.
Bu vətəndaşlar Riqada qalan digər soydaşlarımızla birlikdə “AirBaltik” aviaşirkətinin xüsusi çarter reysi ilə Bakıya yola düşəcəklər.
Xatırladaq ki, Azərbaycanın Litvadakı səfirliyi karantinin ilk günlərindən burada yaşayan soydaşlarımızla daim əlaqədə olub, onların qarşılaşdıqları çətinliklərin aradan qaldırılması üçün müvafiq addımlar atılıb. Maddi çətinliklərlə üzləşən tələbələrimizə yardımlar edilib, tikinti sektorunda muzdla işləyən və koronavirus infeksiyası səbəbindən işini itirən vətəndaşlarımıza hüquqi yardım göstərilib, çalışdıqları şirkətdən maaşlarının alınmasında, yaşayış yeri ilə təmin olunmasında dəstək verilib, xüsusi ehtiyacı olan vətəndaşlarımıza dezinfeksiya maddələri, maska, əlcək və ərzaq yardımı göstərilib.
Bu günədək Litvadan 79 nəfər azərbaycanlı təxliyə edilib.
