Azərbaycan vətəndaşları YAP iqtidarının faydalarını bundan sonra da görəcəklər – Əli Əhmədov
“Bu gün Yeni Azərbaycan Partiyasının yaranmasının 27 ili tamam olur. Partiya Azərbaycan xalqına şərəflə, ləyaqətlə xidmət edir. Onun yaranması və fəaliyyəti kifayət qədər uğurlu olub”.
Rakus.az xəbər verir ki, bunu Baş Nazirin müavini, hakim Yeni Azərbaycan Partiyasının (YAP) sədr müavini-icra katibi Əli Əhmədov jurnalistlərə açıqlamasında deyib.
O xatırladıb ki, YAP yarandıqdan təxminən 6 ay sonra onun lideri Heydər Əliyev Azərbaycanın Prezidenti seçilib: “Beləliklə də YAP Azərbaycanın iqtidar partiyasına çevrildi. Azərbaycanın müasir dünyanın ən uğurlu və sürətlə inkişaf edən dövlətinə çevrilməsinə böyük töhfələr verib. Bu illər ərzində YAP-ın özü də kifayət qədər qüdrətlənib, sıraları genişlənib”.
Ə. Əhmədov bildirib ki, İndi YAP ümumxalq partiyası statusunu ləyaqətlə daşımaqdadır: “Onun sıralarında 750 minə qədər Azərbaycan vətəndaşı var. İnanıram ki, YAP iqtidarının ömrü Azərbaycanın siyasi həyatında kifayət qədər uzun olacaqdır. Azərbaycan vətəndaşları YAP iqtidarının faydalarını bundan sonra da görəcəklər”.
