Azərbaycanda karantin rejimi vaxtında elan edildi – ÜST
“Koronavirusa yoluxan şəxs nə qədər tez aşkar olunsa, onun izolyasiyaya alınması müsbət nəticə verər. Azərbaycan da bu baxımdan təqdirəlayiq addım atmış oldu”.
Rakus.az xəbər verir ki, bunu Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı keçirdiyi online brifinqdə deyib.
O qeyd edib ki, karantin rejiminin vaxtında elan edilməsi də yoluxma sayının azalmasına təsir göstərdi: “Eyni zamanda ölkəyə gələn şəxslərin tək-tək yoxlanılması və virusun aşkar olunduğu şəxslərin ayrılmış xəstəxanalarda vaxtında karantinə alınması alqışlanan addımdır”.
“Azərbaycanda koronavirusa yoluxma sayının artıb sonradan azalması göstəricilərinə baxdıqda artan vaxt pik həddin olduğunu deməyə əsas verir. Bu, aprel ayının göstəricilərinə uyğun səsləndirilə bilər. Amma yenə də dəqiq nəsə demək doğru olmaz”, – ÜST rəsmisi vurğulayıb.
H.Harmancı diqqətə çatdırıb ki, ölkədə hələ də koronavirusa yoluxma halları bitməyib: “Əgər karantin rejimi yumşalsa yenidən virusa yoluxmanın artması riski ola bilər. Ona görə də əhali qaydalara ciddi əməl etməlidir. Hələ ki, vəziyyəti nəzarət altına ala bilmişik”.
