“BakuBuild” sərgisində 280 şirkət iştirak edəcək
Bakı Sərgi Mərkəzində keçiriləcək yubiley Azərbaycan Beynəlxalq İnşaat – “BakuBuild” sərgisində 280 şirkət iştirak edəcək.
Rakus.az xəbər verir ki, bu barədə oktyabrın 21-də XXV “BakuBuild” və XII Beynəlxalq İstilik, Havalandırma, Kondisionerləşdirilmə, Su təchizatı, Santexnika və Üzgüçülük Hovuzu – “Aquatherm” sərgilərinin açılışına həsr olunan mətbuat konfransında “Caspian Event Organisers” şirkətinin rəhbəri Edvard Stron deyib.
O bildirib, “BakuBuild” öz yubileyində Avropa, Asiya və MDB ölkələrini təmsil edən 280 şirkəti bir araya gətirəcək: “Sərgidə Almaniya, Birləşmiş Ərəb Əmirlikləri, İran, İtaliya və digər ölkələrin milli qrupları iştirak edir. Rusiya isə öz sərgidə debüt edəcək”.
“BakuBuild” İqtisadiyyat Nazirliyi, Dövlət Şəhərsalma və Arxitektura Komitəsi, Mənzil İnşaatı Dövlət Agentliyi, Kiçik və Orta Biznesin İnkişafı Agentliyi, Azərbaycan Memarlar İttifaqı, Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir.
