Zlatan İbrahimoviçin heykəli yıxıldı
Barbarlar isveçli futbolçu Zlatan İbrahimoviçin heykəlini uçurublar.
Rakus.az xəbər verir ki, Malmö şəhəri stadionundan kənarda yerləşən heykələ daha əvvəl də xəsarət yetirilib. Bu, İbrahimoviç İsveçin digər klubuna sərmayə yatırandan sonra baş verib.
İndi isə heykəl adları müəyyən olunmamış barbarlar tərəfindən tamamilə uçurulub. Malmö şəhərinin hakimiyyət orqanları bildiriblər ki, onlar heykəli bərpa etmək niyyətindədirlər. Heykəlin müəllifi Piter Linde daha əvvəl baş vermiş bir neçə belə hadisədən sonra insanları bu vəhşiliyi dayandırmağa çağırıb.
Hazırda 38 yaşı olan Zlatan İbrahimoviç Malmö klubunda 20 il əvvəl debüt edib. Dünya şöhrəti qazanan futbolçu ötən ilin oktyabrında öz heykəlinin açılışında iştirak edib. Lakin “Hammarby” klubunun səhmlərinin 25 faizinin İbrahimoviç tərəfindən alınması elan ediləndən sonra 3,5 metrlik tunc konstruksiyanın üzərinə boya tökülüb, yandırılıb, heykəlin əlinə unitazın oturacağı keçirilib.
Xatırladaq ki, polisin heykəlin ətrafına hasar çəkməsinə baxmayaraq, xuliqanların hərəkətlərinin qarşısını almaq mümkün olmayıb.
