“Bələdiyyə layihələrinin icrası sakinlərin rifahını yaxşılaşdırır” – Hümbət Hüseynov
“Binəqədi rayonu M.Ə.Rəsulzadə bələdiyyəsi maliyyə imkanları daxilində sakinlərin rifahı naminə ərazisində məhəllədaxili küçələrə asfalt döşənməsi, təmir-tikinti və abadlıq, təmizlik və digər işlərin həyata keçirilməsinə nail olmuşdur”.
Rakus.az xəbər verir ki, bu fikirləri M.Ə.Rəsulzadə bələdiyyəsinin sədri Hümbət Hüseynov bildirib.
O bələdiyyədə vətəndaşların qəbulu məsələsinə toxunaraq deyib: “Layihələrin böyük bir qismi məhz vətəndaş müraciətləri əsasında həyata keçirilib. Bütün proses “Vətəndaşıarın müraciətləri haqqında” Qanunun 11-ci maddəsinə (Vətəndaşların qəbul edilməsi qaydası) uyğun olaraq həyata keçirilir. Belə ki, vətəndaşların şifahi müraciəti ilə bağlı qəbula dair qeydiyyat-nəzarət vərəqəsində qeyd aparılır. Şifahi müraciətdəki məsələlərin həlli əlavə araşdırma aparılmasını tələb etmədikdə vətəndaşın razılığı ilə müraciət qəbul zamanı şifahi qaydada cavablandırılır. Qəbul zamanı vətəndaşın müraciətini şifahi qaydada cavablandırmaq mümkün olmadıqda müraciət yazılı şəkildə təqdim olunur. Belə müraciətin qəbul edilməsi, qeydiyyatı və ona baxılması qaydası “Vətəndaşların müraciətləri haqqında” Qanunun 7-ci maddəsinə uyğun olaraq həyata keçirilir. 2020-2024-cü illər ərzində vətəndaşlar əsasən torpaq və əmlak vergi borcunun ödənilməsi ilə bağlı şəxsi hesab kodunun açılması, kodun addan-ada dəyişdirilməsi, vergi borcu barədə məlumat almaq, vergi borcunun ödənilməməsinə görə bələdiyyə tərəfindən barəsində qəbul edilmiş icra qərarı ilə bağlı, torpaq məsələləri, maddi yardım göstərilməsi, asfalt vurulması, kanalizasiya xəttinin çəkilməsi, ağacların götürülməsi və ya budanması və s. bağlı məsələlərlə bağlı qəbullar keçirilib”.
Onun sözlərinə görə, 2023-cü il ərzində qəbulda olmuş vətəndaşlardan 341-nin müraciəti yazılı şəkildə qəbul olunub, rəsmi məktublarla onlardan 235-i müsbət cavablandırılıb, 47-sinə müvafiq izahat verilib, 59-u aidiyyəti üzrə göndərilib, yerdə qalan 1034 nəfərin müraciəti şifahi cavablandırılıb.
