İlham Əliyev Paşinyana Qərbi Azərbaycanla bağlı nələri diktə edib?
Qərbi Azərbaycan Xronikası layihəsi çərçivəsində növbəti analitik süjet hazırlanıb.
Rakus.az xəbər verir ki, “Əbu-Dabi görüşündən sonra Paşinyan komandasını Zəngəzura topladı” adlı süjetdə bu il iyulun 11-də Prezident İlham Əliyevlə Baş nazir Nikol Paşinyanın Əbu-Dabidə 5 saata qədər davam edən görüşündən bəhs olunur.
Bildirilir ki, Əbu-Dabi görüşü ümumilikdə Bakı və İrəvan arasında aparılan danışıqların uğurlu mərhələlərindən biri hesab etmək olar: “Son proseslər fonunda Əbu-Dabi görüşündə tərəflərin gündəliyində əsas məsələnin Zəngəzur dəhlizi olduğu hesab olunur. Əslində sülh sazişinin önündəki əsas maneələrdən biri də məhz Ermənistanın dəhlizə qarşı olması, Azərbaycanın Naxçıvana maneəsiz çıxışına imkan verməməsidir. Lakin Paşinyanın Türkiyə səfərindən sonra Azərbaycan və Ermənistanın Zəngəzur dəhlizi ilə bağlı mövqelərinin yaxınlaşdığı haqda məlumatlar var”.
Qeyd olunur ki, Ermənistanda Paşinyanın Zəngəzur dəhlizinin açılması məsələsində Azərbaycanla gizli şəkildə anlaşdığını hesab edirlər. Belə ki, Təhlükəsizlik və hərbi məsələlər üzrə ekspert Hayk Nahapetyan, politoloq Artur Xaçikyan və şərhçi Sevak Hakobyanın fikrincə, Azərbaycan Ermənistandan 150 milyard dollarlıq təzminat tələb edir: “Bunu ödəyə bilməyən Ermənistan da Azərbaycanın istədiyi hər şeyi verməlidir. Ermənistan növbəti güzəştlər silsiləsinə hazırlaşır. Azərbaycanlıların geri qayıtması, Zəngəzur dəhlizinin açılması, Qarabağ döyüşlərində iştirak edən və Azərbaycanın cinayətkar hesab etdiyi şəxslərin Bakıya təhvil verilməsi, Ermənistan konstitusiyasının dəyişdirilməsi və digələri. Paşinyan bunları qəbul edəcək. Mövcud hakimiyyət Ermənistanı regional marionetkaya çevirib. Qarabağda olduğu kimi, Sünikdə də hər şey Azərbaycanın xeyrinə olacaq. Əbu-Dabi görüşündə Zəngəzur dəhlizi və Qərbi Azərbaycan məsələsi əsas müzakirə mövzusu olub. Ermənistan tərəfi Azərbaycanın tələblərini qəbul edib”.
Sonda vurğulanır ki, Əbu-Dabi görüşü ilə bağlı Ermənistan mediasında gedən müzakirələr və irəli sürülən fikirlər olduqca diqqətçəkəndir: “İstisna deyil ki, Əbu-Dabidə baş tutan geniştərkibli görüşdə bu məsələlər müzakirə olunub. Yekun sülh sazişinin imzalanması da Zəngəzur dəhlizinin açılması və azərbaycanlıların öz yurdlarına qayıdışının təmin edilməsi tələblərinin icrası halında mümkün olacaq”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet sənətşünaslıq üzrə fəlsəfə doktoru Elçin Əlibəylinin təqdimatında iyulun 17-də saat 20:30-da Baku Tv-nin efirində və saat 21:30-da YouTube kanalında yayımlanıb.
