BNA “Şamaxinka”ya kamera yerləşdirdi
Bakının Moskva prospekti ilə 20 Yanvar küçəsinin kəsişməsində və kəsişməyə yaxın ərazidə (“Şamaxinka” adlanan ərazidə) Bakı Nəqliyyat Agentliyinin (BNA) əməkdaşları tərəfindən nəzarət gücləndirilib.
Rakus.az xəbər verir ki, adıçəkilən ərazidə qanunsuz parklanmaya qarşı artıq kameraların köməyi ilə mübarizə aparılacaq.
BNA-dan verilən məlumata görə, qurum sürücülərə tövsiyə edir ki, qeyd edilən ərazidə dayanma və durma qaydalarına əməl etsinlər, yolun hərəkət hissəsində qanunsuz dayanmaq və ya durmaqla digər hərəkət iştirakçılarının, xüsusən də müntəzəm marşrut xətt avtobuslarının hərəkətini məhdudlaşdırmasınlar.
Xatırladaq ki, hər gün səhər və axşam pik saatlarında sürücülərin bu qaydalara əməl etməmələri qeyd edilən ərazidə nəqliyyatın axınının nizamsızlığına və hərəkətin iflic olmasına səbəb olur. Bu isə, ilk növbədə, şimal istiqamətindən 20 Yanvar dairəsi, eləcə də əks istiqamətdə hərəkət edən 24 müntəzəm marşrut xətti üzrə 400-ə yaxın avtobusun intervalında gecikmələrə səbəb olur ki, nəticədə 410 min nəfərə yaxın ictimai nəqliyyat istifadəçisinin mənzil başına lüzumsuz yerə əlavə vaxt itkisinə məruz qalmaqla çatmasına gətirib çıxarır.
