Britaniyada “Brexit”lə bağlı müzakirələrə başlanıldı
Britaniyalı deputatlar dekabrın 20-də “Brexit” barədə qanun layihəsinin ikinci oxunuşda müzakirəsinə başlayıblar.
Rakus.az xəbər verir ki, Avropa İttifaqı ilə sazişi əks etdirən mətn Birləşmiş Krallıq parlamentinin İcmalar palatasının üzvlərinin müzakirəsinə çıxarılıb.
“Qanun layihəsi “Brexit” prosesinin yenidən təxirə salması imkanlarını tamamilə istisna edir, biz 2020-ci il yanvarın 31-də Avropa İttifaqını tərk edəcəyik”, – Böyük Britaniyanın Baş naziri Boris Conson bildirib.
“Qanun layihəsi keçid dövrünün 2020-ci il dekabrın 31-də başa çatacağını ehtiva edir”, – hökumət başçısı əlavə edib.
Dinləmələrin beş saata yaxın davam edəcəyi, səsvermənin isə yerli vaxtla saat 14:30-da keçiriləcəyi gözlənilir.
Bu, “Brexit” sazişinin təsdiq edilməsi üçün Britaniya parlamentinin beşinci cəhdidir və bu dəfə hər şey sonuncu cəhdin uğurlu olacağına işarə edir. Belə ki, ötən həftə ölkədə keçirilən növbədənkənar parlament seçkilərində Mühafizəkarlar partiyası inamlı qələbə qazanıb. 80 deputatdan ibarət çoxluğa dayanan Boris Conson prosesi təxirə salmayaraq “Brexit” barədə sövdələşməni yeni parlamentin ikinci iş günündə deputatların müzakirəsinə çıxarıb.
Qanun layihəsinin təsdiq edilməsi üçün deputatların sadə çoxluğu kifayət edir. “Brexit” üzrə sazişin ratifikasiyasının isə yanvarın 9-da başa çatması planlaşdırılır. Bundan sonra qanun layihəsi Lordlar palatası üzvlərinin müzakirəsinə təqdim olunacaq, hər iki palatanın təsdiqindən və kraliça II Elizabet tərəfindən imzalandıqdan sonra qüvvəyə minəcək.
