Bu ərazilər daha çox çirkləndirilir – SİYAHI
“Əgər 70-80-ci illərdə şəhərlərdə atmosferi çirkləndirən mənbələr sırasında sənaye müəssisələri 70-80 faiz ilə üstünlük təşkil edirdisə, son onillikdə vəziyyət dəyişib və nəqliyyat sektoru Bakıda artıq əsas çirkləndiriciyə çevrilib”.
Rakus.az xəbər verir ki, bunu Ekologiya və Təbii Sərvətlər Nazirliyin Milli Hidrometeorologiya Departamentinin direktoru Umayra Tağıyeva mətbuat konfransında bildirib.
Onun sözlərinə görə, atmosferə atılan tullantılar, əsasən, nəqliyyatın payına düşür:
“Nəqliyyatdan fərqli olaraq, əksər sənaye müəssisələrindən atmosfer havasına buraxılan tullantılar texnoloji, ekoloji qaydalara uyğun olaraq borular vasitəsilə müəyyən hündürlükdən atılırlar ki, bu da onların atmosferdə daha tez səpələnməsinə, bununla da konsentrasiyalarının nisbətən azalmasına imkan yaradır və belə müəssisələrin çoxu şəhərin kənarındadır.
İntensiv avtomobil hərəkəti olan şəhər küçələrində – Neftçilər, Dərnəgül, Nobel prospekti, 20 Yanvar dairəsi, Lökbatan dairəsi, Ukrayna dairəsi, Şərifzadə küçəsi, Xırdalan-Sumqayıt yolunda konsentrasiyalar qəbul olunmuş fon göstəricilərindən daha yüksək olur. Bununla yanaşı, qeyd etmək lazımdır ki, istilik effekti yaradan karbon qazı, metan, azot oksidi kimi qazların 15 faizi nəqliyyat sektorunun payına düşür”.
