Bütün uğurlarıma görə müəllimlərimə borcluyam – Tələbə yazır
İndiyə kimi qazandığım az- çox bütün uğurlarıma görə həm də müəllimlərimə borcluyam. O müəllimlərimə ki, heç vaxt öyrətməkdən yorulmayıb, öz biliklərini əsirgəməyib.
Hərdən orta məktəbdə oxuduğum illəri, parta arxasında oturduğum günləri xatırlayıram. Üzərindən xeyli vaxt keçib. Ancaq orta məktəbdəki səmimi, mehriban, gülərüz müəllimlər kimi pedaqoqlar universitetdə də var. Onlar hətta tələbələrinin qayğıları ilə yaşayır, dərsdənkənar məsələlərdə də köməklik etməkdən çəkinmirlər.
Elə müəllimlərim var ki, mənə dərs keçməyiblər. Lakin yenə də mən onlara ” müəllimlərim” deməyə borcluyam. Çünki özlərinin yüksək insani keyfiyyətləri ilə nümunə olub, bir böyük kimi həmişə yol göstəriblər. Hələ bir də auditoriyadankənar keçilən həyat dərsləri var…
Əlbəttə, müəllimlər günü haqqında yazarkən məşqçi- müəllimləri də unuda bilmərəm. Uşaqlıqdan idmandayam. Yaxşı idmançı ola bilməsəm də idman jurnalistikası ilə məşğul olmağım, bu sahənin incəliklərini dəqiq bilməyim xeyli dərəcədə məşqçilərimin sayəsindədir. Onlar təkcə öyrətmir, həm yetirmələrini böyük həyata hazırlayır, tələbələrində xarakter formalaşdırır.
5 oktyabr- müəllimlər günü münasibətilə bütün müəllimlərimi təbrik edirəm. Yetirmələrinizin yollarındakı qaranlıqlar sizin köməkliyinizlə işıqlanır.
Kənan Novruzov,
BDU-nun jurnalistika fakültəsinin 4-cü kurs tələbəsi
